Паліцыя Прагі прызнала законнымі дзеянні аховы спартыўнай арэны, якая забараніла фанатам знаходзіцца з бел-чырвона-белым сцягам на матчы Кантынентальнай хакейнай лігі пражскага «Льва» з мінскім «Дынама» 28 лютага, паведаміў актывіст беларускай апазіцыі Аляксей Шыдлоўскі, які атрымаў палітычны прытулак у Чэхіі.
«Я з сябрамі прыйшоў на гэты матч з нацыянальным беларускім сцягам падтрымаць «Дынама», — сказаў Шыдлоўскі. — У другім перыядзе падышлі ахоўнікі і папрасілі прыбраць сцяг, таму што гэта не адпавядае нейкім правілам, аднак якім менавіта, растлумачыць не здолелі. Падчас трэцяга перыяду яны паўтарылі свае патрабаванні, а затым, калі я адмовіўся іх выканаць, з прымяненнем сілы выхапілі сцяг».
Пасля гэтага інцыдэнту Шыдлоўскі звярнуўся ў паліцыю Прагі. Днямі ён атрымаў афіцыйны адказ, у якім гаворыцца, што Шыдлоўскі парушыў некалькі пунктаў правілаў наведвання гульняў хакейнага клуба «Леў», таму ахоўныя службы дзейнічалі на законных падставах.
Нягледзячы на гэта, Шыдлоўскі мае намер і надалей наведваць спартыўныя спаборніцтвы ў Празе з удзелам беларускіх клубаў і зборных з бел-чырвона-белым сцягам. «На жаль, Еўропа зараз страчвае сваё аблічча абаронцы правоў чалавека. У маім і іншых выпадках, на жаль, перамагаюць расійскія грошы. У прыватнай размове мне сказалі, што нейкі прадстаўнік расійскіх спонсараў запатрабаваў забраць у мяне сцяг», — паведаміў ён.
Шыдлоўскі неаднаразова зведваў у Беларусі пераследы за свае грамадска-палітычныя перакананні. Гэтак, у лютым 1998 года яго асудзілі на паўтара года пазбаўлення волі паводле абвінавачання ў злосным хуліганстве за нанясенне антыпрэзідэнцкіх графіці на сцены дамоў у Стоўбцах (Мінская вобласць). У 2001 годзе за ўдзел у дзейнасці незарэгістраванага маладзёжнага руху «Зубр» Шыдлоўскі быў прыгавораны да двух гадоў папраўчых работ і выключаны з Інстытута сучасных ведаў. У канцы 2007-га ў дачыненні да яго распачалі яшчэ адну крымінальную справу згодна з артыкулам «Хуліганства», які прадугледжвае да 10 гадоў пазбаўлення волі. Падставай для гэтага стала бойка ў магазіне, якая ўзнікла падчас сваркі Шыдлоўскага з прадаўцом з-за партрэта Аляксандра Лукашэнкі. Шыдлоўскі заяўляў, што бойка была справакаваная. Не чакаючы суда, ён выехаў з Беларусі і ў 2009 годзе атрымаў палітычны прыстанак у Чэхіі.
