Пракуратура Брэсцкай вобласці накіравала для разгляду ў суд крымінальную справу ў дачыненні да жыхара Санкт-Пецярбурга па факце кантрабанды наркатычных сродкаў і іх незаконнага абароту з мэтай збыту ў буйным памеры.
Як паведаміў БелаПАН старшы памочнік пракурора Брэсцкай вобласці па наглядзе за выкананнем заканадаўства аб дзяржаўнай бяспецы Эдуард Прылуцкі, 5 снежня 2013 года 46-гадовы расіянін спрабаваў увезці ў Беларусь праз пункт пропуску «Варшаўскі мост» 87 кг 281,34 г гашышу. Спрасаваны ў брыкеты гашыш быў схаваны ў спецыяльна абсталяваных тайніках у аўтамабілі «Фольксваген-Пасат».
Упраўленнем КДБ па Брэсцкай вобласці, якім праводзілася расследаванне гэтай крымінальнай справы, дзеянні жыхара Санкт-Пецярбурга кваліфікаваныя па ч. 2 арт. 228 і ч. 3 арт. 328 КК.
Меру пакарання абвінавачванаму вызначыць суд Маскоўскага раёна Брэста.