Пятро Парашэнка прыйшоў галасаваць разам з жонкай і чатырма дзецьмі.

Ва Украіне ўчастковыя выбарчыя камісіі скончылі падлік галасоў і перадалі звесткі ў акруговыя выбаркамы. Працягваецца апрацоўка галасоў. Пакуль дадзеныя падліку супадаюць са звесткамі экзіт-полаў. У першым туры перамагае кандытарскі магнат Пятро Парашэнка. Ён набірае каля 55%.

Як паведамляе ЦВК, ён сабраў большасць галасоў ва ўсіх рэгіёнах Украіны. Найбольш за яго галасавалі на Львоўшчыне (70%) і Вінніччыне (66%). У Луганскай вобласці ён набірае 33%, а ў Данецкай — 40%. Праўда, там галасаванне адбылося толькі прыкладна на траціне тэрыторыі.

Гэта першы ў гісторыі ўкраінскіх выбараў выпадак, калі ўсход і захад галасавалі амаль салідарна.

У 1991 годзе ў трох абласцях Галіччыны перамог кіраўнік Народнага руху Чарнавол, у астатніх абласцях — посткамуніст Краўчук.

У 1994 годзе на правым беразе Дняпра, акрамя Адэсы, Херсона і Мікалаева, перамог Краўчук, на левым — Кучма.

У 2004 годзе Юшчанка ўзяў усе вобласці, у якіх у 94-м узяў верх Краўчук, плюс левабярэжныя Чарнігаў, Палтаву і Сумы. У 2009 годзе Цімашэнка перамагла ў тых самых абласцях.

На ўчорашніх выбарах гістарычную паразу зазналі камуністы (усяго 1% галасоў) і Партыя рэгіёнаў (два кандыдаты выхадцы з яе сабралі ўсяго 8% галасоў). Гэта вынік акупацыі Крыма і большай паловы Данбаса. Без гэтых рэгіёнаў Украіна галасуе за праеўрапейскія нацыянальныя партыі.

Украінцы разглядалі выбары 25 мая як своеасаблівы адказ Пуціну: многія людзі прыйшлі на ўчасткі ў вышыванках. Наплыў людзей быў такі, што ў Кіеве не ўсе паспелі прагаласаваць.

Клас
Панылы сорам
Ха-ха
Ого
Сумна
Абуральна

Хочаш падзяліцца важнай інфармацыяй ананімна і канфідэнцыйна?

Каб пакінуць каментар, калі ласка, актывуйце JavaScript у наладах свайго браўзеру