Маскоўскі суд па просьбе пракуратуры прысудзіў неанацыста Максіма Марцінкевіча па мянушцы Цясак да пяці гадоў калоніі строгага рэжыму. Марцінкевіча ў трэці раз судзяць за распальванне міжнацыянальнай варожасці.
Суддзя Кунцаўскага суда Масквы Святлана Ухналёва пагадзілася з пракуратурай, якая прасіла для абвінавачанага 5 гадоў пазбаўлення волі.
Марцінкевіча прызналі вінаватым у распальванні нянавісці і варожасці з-за размяшчэння ў інтэрнэце экстрэмісцкіх ролікаў.
Цясак абвінавачваўся ў размяшчэнні ў верасні-кастрычніку 2013 на яго старонцы ў сацсетцы «Укантакце» трох відэаролікаў экстрэмісцкага зместу.
У студзені гэтага года Марцінкевіч, абвешчаны да таго часу ў вышук, быў затрыманы на Кубе і экстрадаваны ў Расію.
Адвакат асуджанага Мацвей Дзэн сказаў журналістам, што будзе абскарджваць прысуд. Абарона настойвала на тым, што ў дзеяннях Марцінкевіча адсутнічае склад злачынства. Сам Марцінкевіч прызнаваў, што размяшчаў два відэаролікі, але падкрэсліваў, што ніякага дачынення да мантажу або здымкі не меў.