У аўтадарожным пункце пропуску «Брэст» 24 жніўня быў затрыманы грамадзянін Расіі, які спрабаваў правезці цераз мяжу марыхуану.
Як паведамілі у Брэсцкай пагранічнай групе, чацвёра маладых расіян, якія ўязджалі з Польшчы ў аўтамабілі «Фальксваген», выбралі зялёны калідор. З ініцыятывы брэсцкіх памежнікаў пасля перасячэння лініі, якая абазначае выезд з зялёнага калідора, транспартны сродак быў спынены і накіраваны ў бокс для паглыбленага надгляду.
Гэта вымусіла вадзіцеля «Фальксвагена» 22-гадовага жыхара Масквы паспрабаваць пазбавіцца ад пачка молатай кавы, што было зафіксавана сістэмай відэаназірання. Падчас надгляду, праведзенага сумесна з супрацоўнікамі Брэсцкай мытні, у пачку былі знойдзены дзевяць пакетаў з рэчывам расліннага паходжання зялёнага колеру агульнай вагой 6,4 г, як мяркуецца, марыхуанай.
Рэчыва канфіскаванае супрацоўнікамі Брэсцкай мытні і накіраванае на экспертызу.
У выніку надгляду ў асабістых рэчах пасажыраў таксама былі знойдзеныя дзве курыльныя трубкі. Праведзены спецыялістамі наркалагічнага дыспансера агляд устанавіў факт ужывання вадзіцелем і трыма яго пасажырамі наркатычных сродкаў без прыкмет наркатычнага ап'янення.
Вадзіцель «Фальксвагена» затрыманы. Брэсцкай мытняй у дачыненні да яго распачатая справа на падставе ч. 2 арт. 228 КК (кантрабанда). Затрыманы растлумачыў, што перавезці наркотыкі цераз мяжу яго папрасіў невядомы.