У Беларусі з адабрэннем успрынята падпісанне 5 верасня ў Мінску кантактнай групай Украіна — Расія — АБСЕ пратакола аб спыненні агню паміж супрацьборствуючымі сіламі на ўсходзе Украіны, гаворыцца ў распаўсюджанай 6 верасня заяве Аляксандра Лукашэнкі ў сувязі з пачаткам мірнага працэсу па ўрэгуляванні ўкраінскага крызісу.
«Гэта доўгачаканая навіна ўсяляе хай і нясмелую, але надзею на ўсталяванне поўнага і беззваротнага міру ў гэтым рэгіёне», — адзначыў беларускі кіраўнік.
«Канфлікт у блізкай для нас славянскай дзяржаве быў апошнім часам самым хвалюючым, ён абмяркоўваўся ў міжнародным парадку дня. Бо пад пагрозу былі пастаўлены пытанні забеспячэння не толькі рэгіянальнай, але і міжнароднай бяспекі. Без перабольшання можна сказаць, што вайна рэальна замаячыла на парозе нашага агульнага еўрапейскага дома», — гаворыцца ў заяве.
«Трэба аддаць належнае ініцыятывам і прапановам у першую чаргу прэзідэнтаў Украіны і Расіі, — адзначыў Лукашэнка. — Менавіта дзякуючы іх прынцыповым дамоўленасцям на вышэйшым узроўні, дасягнутым у канцы жніўня на мінскай зямлі, быў пакладзены пачатак мірнаму працэсу».
Паводле яго меркаванні, фармат зносін Мытны саюз — Украіна — Еўрапейскі саюз дазволіў прыцягнуць да перагаворнага працэсу бакі, якія рэальна зацікаўленыя ў міры на ўкраінскай зямлі і ў Еўропе. Вельмі важнымі і своечасовымі былі і канкрэтныя прапановы прэзідэнта Казахстана па ўрэгуляванні канфлікту, лічыць беларускі кіраўнік. «Без усякага сумнення, без настойлівых намаганняў лідараў вядучых дзяржаў Еўрапейскага саюза было б немагчымым дасягненне перамір`я ва ўсходніх раёнах Украіны.», — падкрэсліў Лукашэнка
Ён лічыць, што «выключна важную ролю», адыграла кантактная група ў складзе Леаніда Кучмы, Міхаіла Зурабава, а таксама прадстаўнікоў апалчэння і АБСЕ.
«Яна правяла сапраўды тытанічную працу і дасягнула згоды па пытаннях, вырашэнне якіх здавалася абсалютна немагчымым некаторы час таму, — гаворыцца ў заяве. — Праца кантактнай групы заслугоўвае сапраўднай падзякі і заахвочвання».
«Гэта, дарэчы, адзін з нешматлікіх выпадкаў, калі і АБСЕ адыграла менавіта тую ролю, для якой яна і стваралася, і ўнесла свой пэўны ўнёсак у забеспячэнне рэгіянальнага міру і бяспекі», — заўважыў Лукашэнка.
«Мы ганарымся тым, што пачатак гэтаму мірнаму працэсу быў пакладзены ў Мінску, на беларускай зямлі. Мы і надалей будзем рабіць усё магчымае ў імя міру ў брацкай краіне. Нашы народы ўдосталь напакутаваліся ў войнах мінулага стагоддзя, і не хацелася б, каб такія пакуты паўтарыліся і ў стагоддзі цяперашнім», — гаворыцца ў заяве.
Лукашэнка адзначыў, што «сёння вестка аб дасягненні дамоўленасцяў аб спыненні агню паўсюль успрымаецца з радасцю і надзеяй».
«Але мы павінны добра разумець, што гэта толькі першы крок на доўгім і цяжкім шляху. Неабходна пераадолець яшчэ масу нечаканасцяў і перашкод, каб працэс Мінскага міру стаў беззваротным», — заявіў ён.
Кіраўнік дзяржавы «перакананы, што працу кантактнай групы варта прадоўжыць, магчыма, надаць ёй больш паўнамоцтваў і падняць яе ўзровень для паспяховага ўвасаблення ў жыццё ўсіх дасягнутых дамоўленасцяў.
«Цяпер трэба ўсім уцягнутым бакам спыніцца і задумацца. Задумацца пра будучыню краіны і народа. Не разбуральная вайна, а толькі мірная стваральная праца забяспечыць дабрабыт дзяржавы і простага чалавека», — гаворыцца ў дакуменце.
«Узброены братазабойчы канфлікт у роднай для нас Украіне застанецца цяжкім калецтвам на целе ўкраінскага народа. Але гэта паступова забудзецца. У памяці людзей застануцца тыя, хто здолеў павярнуць кола вайны ў бок міру», — лічыць Аляксандр Лукашэнка.
