Прэм'ер-міністр Расіі Дзмітрый Мядзведзеў падпісаў распараджэнне, якім ухваліў праект міжурадавага расійска-беларускага пагаднення аб выдачы Беларусі дзяржаўнага крэдыту на 1 млрд 550 млн долараў ЗША.
Распараджэнне апублікавана на партале pravo.gov.ru.
У адпаведнасці з пагадненнем, якое павінны падпісаць расійскі і беларускі бакі, крэдыт выдаецца на мэты пагашэння і абслугоўвання дзярждоўгу і папаўнення золатавалютных рэзерваў Беларусі.
Першы плацеж па крэдыце павінен быць ажыццёўлены 15 студзеня 2019 года, крэдыт будзе гасіцца роўнымі долямі раз у паўгода — 15 студзеня і 15 ліпеня.
Працэнтная стаўка, у адпаведнасці з пагадненнем, роўная сярэдняй арыфметычнай прыбытковасці ўсіх аблігацый федэральнай пазыкі Расіі, якія абарачаюцца на Маскоўскай біржы.
Паводле ацэнак экспертаў, за кошт гэтага крэдыту беларускі бок зможа пагасіць атрыманы раней брыдж-крэдыт «Банка ВТБ» (Расія). Яго агульны памер складае 2 млрд. долараў, якія былі накіраваны ўладамі Беларусі на папаўненне золатавалютных рэзерваў.
Высветлілася таксама, што брыдж-крэдыт не быў адзіным, а складаўся з дзвюх частак: пралангаваны снежаньскі крэдыт у памеры 450 млн долараў і 1,5 млрд долараў.
Раней на вышэйшым узроўні была ўзгоднена выдача Расіяй міждзяржаўнага крэдыту Беларусі на 2 млрд. долараў. Аднак выдзяленне гэтага крэдыту запатрабавала ўнясення паправак у бюджэт Расіі, таму было прынята рашэнне аб выдзяленні брыдж-крэдыту на 2 млрд долараў.
Меркавалася, што міждзяржаўны крэдыт Расія зможа выдзеліць Беларусі не пазней за верасень гэтага года і за кошт гэтага крэдыту беларускі бок пагасіць брыдж-крэдыт «Банка ВТБ» (Расія).
