Учора кіроўцы абураліся тым, што рух у цэнтры Масквы перакрылі, а грамадзкасьць даведалася: Уладзімера Пуціна падтрымліваюць ужо і дзеці 8‑15 гадоў. Яны, аказваецца, чакаюць, калі прэзыдэнт дасьць ім «вэктар разьвіцьця». «Нашысты» вывелі на Васільеўскі спуск і Балотную плошчу ў Маскве прадстаўнікоў дзіцяча‑юнацкага руху «Мішкі». Сярод іх былі ляўрэаты званьняў «мядзьведзь‑бадзяга» і «мэгасупрэрмядзьведзь».
Юныя пуцінцы толькі нядаўна вылезьлі зь бярлогу — арганізацыя сфармавалася ўсяго два месяцы таму. У ёй 3000 дзяцей і 1500 важатых. Як заявіла «МК» камісарка «Нашых» і кіраўнічка «Мішак» Юлія Зімава:
«Мы хочам, каб Уладзімер Уладзімеравіч стаў нашым настаўнікам і лідэрам, каб задаў нам вэктар!»
Балотная плошча была падобная на рынак мяккіх цацак — людзі ціскалі плюшавых мядзьведзяў і дэманстравалі курткі з надпісам «Галоўны мішка, падбай пра дзіцятак». Пад «галоўным мішкам» меўся на ўвазе УУП: важатыя арганізацыі (дзяцей у іх хапbла розуму не прыводзіць) павіншавалі прэзыдэнта зь перамогай і запісалі для гаранта відэапасланьне, у якім папрасілі яго стаць сваім стырнавым.— Я пытаюся ў малечы, хто наш прэзыдэнт, а яны хорам крычаць: «Дзядзя Вова!», — натхнёна патлумачыла важатая Марыя.
Ейная каляжанка Вольга адкрыла нам таямніцы «Мішак»:
«Важатыя набіраюць у сваім двары групу з тузіна дзетак ад 8 да 15 гадоў і арганізуюць іх вольны час. У важатых ёсьць званьні: «мядзьведзь‑бадзяга» — той, хто правёў дзесяць мерапрыемстваў. «Буры», ці «мэгасупэрмядзьведзь» — той, хто вырашыў дзіцячыя праблемы ў горадзе.
Дзеці таксама дзеляцца на катэгорыі: самыя старэйшыя — «алімпійскія мядзьведзі», самыя малодшыя — «мішуткі».
«Мядзьведзем‑бадзягай» аказалася 18‑гадовая Маша з Сочы. Зрэшты, сюсюкала яна не па ўзросьце:
«Хутка дзядзя Пуцін сыдзе ў адстаўку, яму будзе рабіць няма чаго, і ён прыме нашу прапанову!»
Важатыя маюць намер адукоўваць сваіх гадаванцаў палітычна:
«У восем гадоў гэта бессэнсоўна, а тым, хто старэйшы, раскажам пра «аранжавую» пагрозу».
Што да грошай, на якія жывуць «Мішкі», то ў руху запэўніваюць: важатыя — валянтэры, а з інвэнтаром дапамагаюць бацькі. Але наўрад ці прывоз тысячы грамадзян у Маскву быў бацькам па кішэні. Ёсьць інфармацыя, што «бадзяг» спансірюць буйныя банкі й рэгіянальны бізнэс.
Могуць пракрамлёўскія энтузіясты хоць дзяцей пакінуць у спакоі? Калі так пойдзе далей, хутка на вуліцы вывезуць у вазочках членаў руху «Медзьведзянятачкі», а сьледам пройдуць цяжарныя грамадзянкі — члены арганізацыі «касалапыя эмбрыёнчыкі»…