Слуханне ў Вярхоўным судзе крымінальнай справы ў дачыненні да былога старшыні канцэрна "Белнафтахім" Аляксандра Бароўскага пачнецца ў сярэдзіне студзеня. Пра гэта на прэс-канферэнцыі 22 снежня ў Мінску паведаміў генеральны пракурор Пётр Міклашэвіч. Паводле яго слоў, судовы працэс над высокапастаўленым чыноўнікам будзе адкрытым.
Нагадаем, на прэс-канферэнцыі 31 кастрычніка П.Міклашэвіч паведаміў, што Генпракуратура завяршыла расследаванне аднаго эпізоду па справе былога кіраўніка дзяржаўнага канцэрна. Гэты эпізод звязаны са злоўжываннямі службовымі паўнамоцтвамі. Устаноўлена прычыненне ўрону ў 1 млн. 600 тыс. долараў ЗША. "Па астатніх эпізодах расследаванне працягваецца", — сказаў генпракурор і зазначыў, што падчас далейшай работы следства будзе ўстанаўлівацца магчымае дачыненне да гэтай справы іншых асоб.
Яшчэ раней, 25 чэрвеня, на сустрэчы з журналістамі генпракурор паведаміў, што А.Бароўскаму інкрымінуюцца тры склады злачынства. У дачыненні да яго распачата справа на падставе ч. 4 арт. 210 Крымінальнага кодэкса (крадзеж шляхам злоўжывання службовымі паўнамоцтвамі ў асабліва буйным памеры). 6 чэрвеня А.Бароўскаму было выстаўлена абвінавачанне ва ўчыненні гэтага злачынства. 8 чэрвеня Генеральная пракуратура распачала справу на падставе ч. 3 арт. 424 КК (злоўжыванне службовымі паўнамоцтвамі, што пацягнула буйны ўрон). Акрамя таго, у дачыненні да А.Бароўскага расследуецца справа на падставе ч. 2 арт. 375 КК — па факце наўмыснага раскрыцця звестак, якія ўяўляюць службовую тайну. Расследаванне вядзе КДБ.
Схема злачыннай дзейнасці, зазначыў П.Міклашэвіч, тычылася аперацый пры закупцы і рэалізацыі нафтапрадуктаў.
А.Бароўскі быў затрыманы 29 мая.
