Праграма на вакацыі

Канцэрты

Тройца

6 студзеня ў «ROCK‑HOUSE CAFЕ» (Няміга, 12) выступае этна‑трыё «Троіца» з «Калядным канцэртам». Пачатак а 21‑й.

Вайцюшкевіч

7 студзеня ў малой залі КЗ «Менск» — Зьміцер Вайцюшкевіч і WZ‑Orkiestra з традыцыйным сьвяточным канцэртам «Сустрэча на Каляды» — калыханкі, калядкі, прэм’еры. Квіткі: 15000—27000. Пачатак а 19‑й.

Выставы

Калядны шопінг у «Падземцы»

Да 14 студзеня Арт‑галерея «Падземка» (пр. Незалежнасьці, 43) запрашае на традыцыйны «Елачны кірмаш 2007». Каралева гэтага сьвята — елка — зьдзівіць і пацешыць Вас нечаканымі выяўленьнямі і формамі. У залях галерэі — працы найлепшых беларускіх мастакоў, дызайнэраў і сяброў галерэі. Вас чакаюць жывапіс, графіка, фатаграфія, кераміка, а таксама самаробныя цацкі і падарункі.

Калядная бяседа

У Мастацкім музэі — выстава «Калядная бяседа», на якой можна ўбачыць творы Валер’я Славука (графіка), Ганны Балаш (лялькі і арт‑аб’екты), Данілы Парнюка (фота). На гэтай выставе ў якасьці адной з асноўных пазначаная тэма бяседы каралёў (тры асноўныя сымбалі¬чныя пэрсанажы выставы — Кароль, Каралева, Блазан). Выстава працуе да 11 студзеня.

Калядны кірмаш

Галерэя «Ла‑Сандр Арт» (Раманаўская слабада, 24) да 15 студзеня запрашае на «Калядны кірмаш» — пярэсты калейдаскоп твораў беларускіх мастакоў.

Выстава ў гонар перамогі на Сініх водах

У менскай галерэі «Арт‑блік» (вул. Някрасава, 11/34) адкрылася выстава «Віват, Альгерд! Хвала Айчыне». Яна прысьвечаная 645‑годзьдзю перамогі беларускага войска Вялікага Княства Літоўскага ў бітве з татарамі на Сініх водах. Наладзіла выставу мастацкая суполка «Пагоня». Прадстаўленыя партрэты вялікага князя Альгерда аўтарства Арлена Кашкурэвіча і Міколы Купавы, «Бітва на Сініх водах» Міхася Басалыгі і выявы беларускіх гарадоў, гістарычна зьвязаных з падзеямі на Сініх водах. Выстава невыпадкова адкрылася ў калядны вечар, адзначыў мастак Мікола Купава: «Альгерд з войскам пайшлі ў дзікія стэпы ў жніўні. Нібыта ў верасьні адбылася бітва. І менавіта да Калядаў яны вярнуліся ў Вільню зь перамогай».

Жывапіс і графіка Мсьціслава Дабужынскага

У Мастацкім музэі да 8 студзеня працуе выстава жывапісу і графікі Мсьціслава Дабужынскага (1875—1957). Графік і плякатыст, жывапісец, яго імя злучана з сусьветнай культурай к.XIX—п.XX ст.