 Данчык |
Данчык (Багдан Андрусішын) нарадзіўся, вучыўся і пражыў большую частку жыцьця ў Нью‑Ёрку. Ягоны бацька Паўло — украінец, а маці Юлія — беларуска. Зь дзяцінства Данчык выдатна ведае і беларускую, і ўкраінскую мовы. Калі яму было 16 год, ён трапіў на канцэрт «Песьняроў», — ансамбль гастраляваў у Амэрыцы. А ўжо праз год Данчык запісаў свой першы альбом, які стаўся першай беларускай кружэлкай у ЗША. «Беларусачка» была запісаная ў 1977 годзе ў ЗША і выдадзеная на кампакт‑дыску праз 30 год ў Менску. Пасьля Данчык запісаў яшчэ пяць альбомаў.
Апошні альбом, «Калядныя песьні», запісаны Данчыкам у 1997 годзе, пасьля апошняга канцэрта ў Амэрыцы, калі ён заявіў, што спыняе сваю музычную кар’еру. Асноўным заняткам Данчыка стала журналістыка.
Цяпер «Беларуская музычная альтэрнатыва» распачала ў Беларусі перавыданьне на кампакт‑дысках усіх альбомаў Данчыка — нядаўна, 19 сьнежня 2007 году, у менскай сядзібе БНФ прэзэнтаваліся адразу тры кампакт‑дыскі Данчыка.
Кіраўнік праекту Віталь Супрановіч і музыказнаўца Вітаўт Мартыненка дапоўнілі і ўдакладнілі выданьне дыскаграфіі Данчыка, адшукалі і дадалі альбом украінскіх песень у ягоным выкананьні. У адзін з дыскаў увайшоў і дакумэнтальны фільм «Данчык», зьняты «Беларусьфільмам» падчас прыезду сьпевака ў Беларусь у 1989 годзе.
Слухачы Данчыка ведаюць, слухаюць, любяць і чакаюць з новымі канцэртамі.
Музычны крытык зь Менску Зьміцер Падбярэскі паведаміў, што прадстаўнікі музычна‑клюбнай сфэры Беларусі ўжо зьвярталіся да яго з сур’ёзнымі запытамі адносна магчымых канцэртаў Данчыка, і нават выдатныя беларускія гітарысты, якія маглі б падыграць сьпяваку, ужо вызначаныя.
«Добра было б, каб Данчык прыехаў з канцэртам — гэта было б проста класна», — кажа Зьміцер Падбярэзкі.
