Дарадца старшыні Службы бяспекі Украіны Маркіян Лубкіўскі пацвердзіў, што ў Кіеве былі затрыманыя дзве грамадзянкі Расіі, карэспандэнткі Life News.
Лубкіўскі паведаміў, што абедзве яны ў бліжэйшы час будуць дэпартаваныя з Украіны з наступнай забаронай уязджаць на тэрыторыю краіны на працягу бліжэйшых пяці гадоў.
«Дзейнасць гэтых грамадзянак Расійскай Федэрацыі не мае нічога агульнага з журналісцкай дзейнасцю, і мы расцэньваем яе як пагрозу бяспецы і нацыянальным інтарэсам Украіны», — напісаў Лубкіўскі на сваёй старонцы ў «Фэйсбуку».
Раней расейскі МЗС запатрабаваў неадкладна вызваліць здымачную групу Life News — карэспандэнтку Лізавету Храмцову і аператарку Наталлю Калышеву.
«Сувязі з імі няма, іх месцазнаходжанне невядоме, — адзначаецца ў заяве міністэрства. — Патрабуем неадкладна адпусціць расійскіх журналістаў і спыніць заганную практыку запалохвання прадстаўнікоў СМІ».
Следчы камітэт Расіі ў пятніцу пачаў крымінальную справу па факце выкрадання і перашкодзе законнай дзейнасці журналістаў.
