Пасля рэферэндуму 1995 года ў Беларусі дзве дзяржаўныя мовы — руская і беларуская. Праўда, часта выкарыстоўваецца наменклатурная мова. Яна знешне падобная да рускай, але ўтрымлівае звароты, зусім нязвыклыя для сучаснай мовы ўсходняга суседа.
Гэтая мова ўспрымаецца арганічна ў розных кантэкстах. Але адносна папулярнага рок-гурту «Без Білета» гучыць крыху сюррэалістычна. Асабліва з улікам таго, што гурт выступіць 14 лютага — на Дзень усіх закаханых.
Канцэрт «Без Білета» з праграмай «Зорка» ў 2012 годзе. Фота: Алена Хацкевіч, Ultra-Music
Ваўкавыскі райвыканкам паведамляе, што «на основании письма заместителя генерального директора по идеологической работе МКСМ «Минск-арена»» і «в соответствии с рекомендациями Комитета государственного контроля» канцэрт рокераў «Без Білета» будзе ладзіцца на «Мінск-Арэне».
Можа адны музыкі думаюць, што граюць дзеля публікі, а іншыя — дзеля грошаў, але «Без Білета» зладзілі выступ «с целью пропаганды деятельности белорусских исполнителей».
«Лай-лай-лай-лай-лай, мая краіна Беларусь», — дзяржкантроль рэкамендуе, хай прапагандуюць.
Проста прыйсці на канцэрт — панура. Лепей «бесплатная экскурсионная программа в МКСК «Минск-арена» по предварительной заявке». І не забыць галоўнае — «в холлах комплекса к услугам посетителей будут предложены холодные и горячие закуски, чай и кофе».
Гурт «Без Білета», верагодна, радуецца магчымасці наведаць бясплатную экскурсію на Мінск-Арэну. Фота з сайта bezbileta.net
Гэта не жарты — «2015 год объявлен Годом молодёжи»! А раз на «Без Білета» хутчэй пойдзе моладзь, то «данное мероприятие может составить хорошее дополнение к республиканским тематическим проектам».
Абдымашкі ў цёплым натоўпе, сэлфі з Віталям Артыстам, а пад галоўныя хіты глядзіш і стэйдж-дайвінг — «зрители смогут весело и содержательно провести свободное время». Такая рамантыка.
«Дзень безбілетніка» ў 2009 годзе. Фота з сайта bezbileta.net
Што рабіць, калі нягледзячы на бясплатную экскурсію і халодныя ды гарачыя закускі Мінск-Арэна недабярэ слухачоў?
Кіраўнікам прадпрыемстваў па спісе рэкамендуецца «провести соответствующую работу по привлечению молодёжи на данный концерт».
Што будзе з тымі, у каго ў калектыве не знайдзецца рамантыкаў, якія захочуць «содержательно провести свободное время», не ўдакладняецца. Быць можа, загадаюць выхоўваць у падначаленых цёплыя пачуцці і патрыятызм.
На сайце «Без білета» можна параўнаць мову райвыканкама з мовай гурту. Чыя больш адпавядае Дню ўсіх закаханых?
