 |
Праект пастановы будзе ў найбліжэйшы час дапрацаваны, узгоднены і да канца студзеня ўнесены прэзыдэнту на подпіс. Аляксандар Лукашэнка заявіў, што праца па будаўніцтву атамнай электрастанцыі павінна пачацца ўжо сёлета: маўляў, «у беларускім грамадзтве ўжо ўсталявалася разуменьне, што альтэрнатывы ядзернай энэргетыцы ў Беларусі няма».
Дырэктар навукова‑дасьледчага інстытуту ядзерных праблем БДУ прафэсар Уладзімер Барышэўскі выступае за будаўніцтва АЭС:
«Атамную электрастанцыю, канечне ж, трэба будаваць. Я лічу, што ўсе чарнобыльскія жарсьці — гэта злачынства супраць нашага народу. Чалавецтва наагул калі хоча выжыць, павінна будаваць атамныя электрастанцыі, разьвіваць тэрмаядзерную энэргетыку.».
Ужо падпісаны ўказ «Аб некаторых захадах па будаўніцтву атамнай электрастанцыі», створаны Дэпартамэнт па ядзернай і радыяцыйнай бясьпецы, Дырэкцыя па будаўніцтву АЭС — заканадаўства аптымізавана.
Але, на думку Аляксандра Лукашэнкі,
«падрыхтоўка да будаўніцтва АЭС ідзе марудна, няма дакладнага бачаньня альгарытмаў… Дагэтуль няма пэўнасьці па многіх найважнейшых аспэктах: месцы будаўніцтва, праекту і генэральнаму падрадчыку».
Міністар фінансаў Мікалай Корбут паведаміў, што прыблізны кошт праекту можа скласьці каля 4 мільярдаў даляраў. Крыніцамі фінансаваньня зьяўляюцца бюджэтныя сродкі, зьнешнія пазыкі, фонд нацыянальнага разьвіцьця і інавацыйны фонд Міністэрства энэргетыкі.
Канчатковы выбар пляцоўкі пад будаўніцтва АЭС плянуецца зрабіць вясной 2008 году. Гэта будзе тэрыторыя плошчай каля 100 квадратных кілямэтраў, потым будзе вызначанае і канкрэтнае месца (10—12 кв.км), дзе будзе знаходзіцца сама станцыя. Пакуль жа разглядаецца некалькі патэнцыйных пляцовак для будаўніцтва АЭС у Магілёўскай вобласьці. Адна зь іх у раёне Горак. На мінулым тыдні мясцовыя жыхары стварылі там антыядзерную групу і пачалі збор подпісаў супраць будаўніцтва АЭС.
«Эканамічны эфэкт, пра які ўлады распавядаюць, у адзін момант можа абярнуцца вялікімі стратамі: і чалавечымі, і эканамічнымі, і палітычнымі, і экалягічнымі. Бо вопыт Чарнобыля ўжо шмат каго навучыў. І стварэньне нашай антыядзернай групы мела на мэце актывізаваць працу па супрацьстаяньні будаўніцтву станцыі, біць ва ўсе званы», — распавядае прэсавы сакратар новастворанай грамадзкай ініцыятывы Эдуард Брокараў.
Міністэрства энэргетыкі Беларусі пры кансультацыйнай падтрымцы замежных адмыслоўцаў распрацавала графік работ па будаўніцтву АЭС. Адначасова будуць будавацца два блёкі: першы павінен быць уведзены ў 2018 годзе, другі — праз год‑два. На поўную магутнасьць беларуская атамная станцыя павінна выйсьці ў 2020 годзе.
