Фота: thenomad.info
Каралеўства Іарданія анансавала поўны пераход рэлігійных устаноў на альтэрнатыўныя крыніцы энергіі, перадае The Nomad. Каралеўства называе сябе лідарам Арабскага свету па вытворчасці электраэнергіі з альтэрнатыўных крыніц.
Па словах кіраўніка Дэпартамента аднаўляльнай энергіі Ахмеда Абу Саа, фотаэлектрычныя сонечныя сістэмы для вытворчасці электраэнергіі будуць усталяваныя ў мячэцях Каралеўства ў межах праекту, што будзе ажыццяўляцца на працягу гэтага года.
Для пачатку ад сонечнай энергіі будуць засілкаваныя 120 мячэцяў. Калі праект дакажа эфектыўнасць, усе 6 тысяч мячэцяў краіны атрымаюць сонечныя панэлі на дахах.
Іарданія імпартуе каля 96% электраэнергіі штогод. І штогод расце як спажыванне, так і тарыфы.
На год у 6-мільённай краіне будуецца блізу 150 новых мячэцяў. Каб праводзіць пяць малітваў на дзень, мячэць мусіць плаціць за асвятленне і кандыцыянаванне штомесяц каля тысячы іарданскіх дынараў — прыкладна 1400 даляраў. Выкарыстанне сонечнай энергіі можа заўважна скараціць выдаткі на рэлігійныя ўстановы.