Згодна з указам №213 ад 6 мая 2014 года супрацоўнікі органаў унутраных спраў, вайскоўцы спецыяльных падраздзяленняў міліцыі і ўнутраных войск МУС Беларусі пяройдуць на новую форму адзення, паведамляе БелТА.
Спецыялісты кажуць, што некаторыя прадметы сённяшняй формы і знакі адрознення маральна састарэлі і не адпавядаюць умовам працы.
Новы дызайн пазбавіць форму лішніх элементаў.
Каб стварыць новую форму, былі даследаваныя папярэднія формы беларускіх сілавікоў і досвед Расіі, Украіны, Польшчы і Ізраіля. Розныя варыянты тканіны правяраў Цэнтр навуковых даследаванняў лёгкай прамысловасці.
Усе прадметы вырабляюцца на прадпрыемствах папраўчай сістэмы і канцэрна «Беллегпрам» з айчыннай тканіны.
Першымі прымерылі новую форму падраздзяленні ППС ГУУС Мінгарвыканкама і страявыя падраздзяленні Дэпартамента аховы МУС. З 2014 года навінкамі забяспечваюцца АМАП, ППСМ, ДПС ДАІ, участковыя і курсанты першага курсу і пачатковай падрыхтоўкі. Астатнія падраздзяленні атрымаюць новую форму па сканчэнні старых камплектаў.
Колер формы стаў на паўтону цямнейшы.
Найбольш істотныя змены ў зімовай форме: уведзеная універсальная куртка з баваўнянай тканіны з цёплай падкладкай.
Жанчыны атрымалі зімовыя шапкі-кубанкі і летнія капялюшыкі, а таксама летнюю сукенку.
Мужчынскія шапкі займелі борцікі. Фуражкі «схуднелі» ў тульі і донцы. Замест баваўняных кашуль цяпер дазволена насіць трыкатажны баваўняны джэмпер сіне-блакітнага колеру.
У форме ёсць багата значных і невялікіх змен, што тычацца ў тым ліку і знакаў адрознення. Але афіцыйны геральдычны сімвал МУС застаўся нязменным.
