Пасля канфліктаў у Іраку і Афганістане, калі мінная вайна з ісламістамі прымушала амерыканскіх жаўнераў выкарыстоўваць добра браніраваныя цяжкія баявыя машыны, прадстаўнікі Сухапутных сіл ЗША зацікавіліся лёгкай і ультралёгкай тэхнікай, якая можа ў лічаныя гадзіны быць перакінутая на любы кантынент і ў любую мясцовасць для правядзення агрэсіўных баявых аперацый, піша сайт defensenews.com.
Бліцкрыг без танкаў — новая канцэпцыя ў Пентагоне; фота gannett-cdn.com
Чакаецца, што такія лёгкія машыны, якія зручна перакідваць нават на верталётах, будуць выкарыстоўвацца для Глабальных сіл рэагавання (GRF). Спецыялісты ў галоўным цэнтры падрыхтоўкі амерыканскай пяхоты ў Форт-Бэнінг лічаць, што гэта таксама дапаможа атакаваць добра прыкрытыя супрацьпаветранай абаронай кропкі праз дэсантаванне з тэхнікай у менш абароненых СПА раёнах. Пасля дэсантнікі на сваёй хуткай наземнай тэхніцы змогуць хутка наблізіцца да цэлі аперацыі і знішчыць яе.
«Мы ведаем, што нам патрэбная мабільная абароненая платформа сярэдняй вагі, якая б дазваляла сілам першай хвалі захапіць і выкарыстаць ініцыятыву», — сказаў журналістам генерал Дэніэл Алін, намеснік штаба Сухапутных сіл ЗША. Амерыканскія танкі і БМП для дэсантавання патрабуюць наяўнасці буйнога аэрапорта, а ў будучыні ЗША мусяць атрымаць не такую цяжкую, але больш мабільную тэхніку, дадаў ён.
Такім чынам, сухапутныя войскі атрымаюць магчымасць атакаваць больш хутка і рашуча, не губляючы той час, які цяпер патрабуецца авіяцыі, каб спачатку знішчыць СПА праціўніка.
Цяпер эксперты па распрацоўцы новых тактычных метадаў у Форт-Бэнінг сфармулявалі патрабаванні для 2 патрэбных ім узораў лёгкай тэхнікі:
— ультралёгкая баявая машына (ULCV) вагай каля 1500кг, якая можа змяшчаць пяхотнае аддзяленне са зброяй і рыштункам і праходзіць да 550 км на адным баку паліва. Яна мусіць таксама транспартавацца верталётамі CH-47 Chinook і UH-60 Blackhawk і мець магчымасць парашутнага дэсантавання з транспартных самалётаў C-130 Hercules і C-17 Globemaster.
— лёгкая выведная машына (LRV) для 6 выведнікаў-дыверсантаў, браніраваная ад стралковай зброі сярэдніх калібраў і аскепкаў 152 мм снарадаў. Таксама мусіць транспартавацца на верталёце CH-47 Chinook.
Плануецца, што падобнай тэхнікі мусіць быць дастаткова для ўзбраення авіядэсантнай брыгады для Глабальных сіл рэагавання. Выкарыстанне такіх машын будзе абмежавана першым этапам апэрацыі, калі раптоўнасць атакі зробіць малаверагоднай сустрэчу з мінамі ці цяжкім узбраеннем праціўніка. Да таго ж мабільная тэхніка дасць магчымасць рухацца ў мясцінах з такім ландшафтам, дзе мала хто будзе чакаць атакі.
