Беларускія скарбы пад адной вокладкай 4

Прэзентацыя фотаальбома журналістаў Белтэлерадыёкампаніі Аляксандра Аляксеева і Алега Лукашэвіча «Cпадчына Беларусі. Скарбы» прайшла 31 студзеня ў Нацыянальным мастацкім музеі.

У альбоме апублікаваны фотаздымкі больш чым 400 каштоўных вырабаў з золата і серабра — манеты, аправы кніг, іконы, царкоўныя рэчы і іншыя прадметы, якія захаваліся на тэрыторыі Беларусі. Як зазначыў А.Аляксееў, на фотаздымках таксама адлюстравана разнастайнасць апрацоўкі мастацкага металу ў краіне: тэхніка чаканкі, чарнення, размаляванай эмалі.

Выявы каштоўных прадметаў размешчаны ў храналагічным парадку. Самыя старажытныя экспанаты былі знойдзены пры археалагічных раскопках, яны датуюцца VII—X стагоддзямі. Гэта ў асноўным манеты і вазы. Найбольш сучасныя вырабы — адноўлены крыж і рака Ефрасінні Полацкай.

Усе прадстаўленыя ў выданні прадметы знаходзяцца ў музейных фондах краіны, а таксама ў праваслаўных і каталіцкіх прыходах.

«Такі каталог створаны ўпершыню, а значыць, нацыянальны набытак захаваны», — зазначыла вядучы рэдактар выдання Ганна Касцялецкая.

Аляксандр Аляксееў (нарадзіўся ў 1978 годзе) скончыў факультэт менеджменту БДЭУ, кандыдат эканамічных навук. З 2001 года працуе на Беларускім тэлебачанні, з’яўляецца аўтарам і вядучым праграмы «Знята!», рэдактарам тэлепраектаў «Наша спадчына», «Новая калекцыя», «Эпоха».

Алег Лукашэвіч, 1972 года нараджэння, скончыў факультэт журналістыкі БДУ, атрымаў спецыяльнасці «рэжысёр» і «аператар тэлебачання» ў міжнародным цэнтры «CIRNEA» у Парыжы. З 1994 года працуе на Беларускім тэлебачанні, з’яўляецца аўтарам праектаў «Знята!», «Наша спадчына», «Новая калекцыя», «Эпоха». У 2001 і 2003 гадах узнагароджаны Ганаровымі дыпломамі імя Ежы Гедройца за публіцыстыку ў сферы культуры, у 2006‑м — Ганаровым дыпломам і медалём за лепшы дакументальны фільм «Эпоха Марка Шагала».

Анастасія Янушэўская, БелаПАН

0

0

0

0

0

0