Аляксандр Новікаў, заснавальнік партала litkritika.by, шмат крыві сапсаваў беларускім пісьменнікам. Ваяваў з «нацыяналістамі», вінаваціў у графаманстве нават Бураўкіна з Барадуліным. Як жа мы былі здзіўленыя, калі пабачылі на інтэрнэт-старонцы гэтага крытыка… рэзкую крытыку Пуціна і паводзін Расіі ва Украіне! Вось што распавёў «Нашай Ніве» сам Новікаў.
Апазіцыянеры і рэвалюцыянеры
Я — патрыёт. З дзяржавай я ніколі не ваяваў, і ўвогуле не падзяляю краіну, Радзіму і дзяржаву. Для мяне гэта ўсё адно. Я за моцную і незалежную Беларусь. А нашая апазіцыя — гэта рэвалюцыянеры. Апазіцыянер павінен быць у апазіцыі да ўлады, фінансавацца мясцовым насельніцтвам ці бізнэсоўцамі. А нашыя толькі дэкларуюць: «Далоў Лукашэнку!». Палова жыве за мяжой, фінансуецца адтуль жа.
Цяпер жа нармальная апазіцыя толькі пачынае з’яўляцца. І адбываецца гэта з-за таго, што робіць Расія. Той жа Лобаў, які кажа, што лепш з Лукашэнкам, чым з Пуціным, — малады, разумны хлопец. Мы фактычна каралеўства, я прызнаю, улада — у руках аднаго чалавека. Але чыноўнікі робяць свае справы. Я, праўда, лічу, што атачэнне прэзідэнта не дае ўсёй інфармацыі прасочвацца да яго. Той жа ўказ, скіраваны на іпэшнікаў, ён жа працуе супраць Лукашэнкі. Я лічу, гэта не яго ідэя — гэта Кабякоў і Пракаповіч.
Мовафілы і беларусізацыя
Мовафілы — гэта тыя, хто любіць мову напаказ. Калі Уладзімір Ліпскі кажа: «Я вымаўляю «Беларусь» і плачу!», то гэта нармальна? Хіба ён сапраўды плача? Да людзей, якія шчыра размаўляюць на беларускай, я стаўлюся нармальна. Больш за тое, я падтрымліваю распаўсюджванне беларускай мовы. Я лічу, што трэба быць нацыяй і ісці да адной дзяржаўнай мовы. І трэба, каб прынялі праграму на дзяржаўным узроўні аб тым, што справаводства ўсё пераходзіць на беларускую мову.
Так, можна даць людзям пэўны тэрмін, каб яны яе вывучылі, напрыклад, гадоў 5. А потым проста не браць на дзяржаўную працу тых, хто не ведае беларускай. Усё афіцыйнае жыццё павінна ісці па-беларуску, нават тэлебачанне трэба перавесці пераважна на беларускую мову.
Я б, шчыра кажучы, і краіну перайменаваў, бо я супраць слова «Русь». Русь сёння сабе дастаткова скампраметавала. Няхай бы назвалі неяк інакш, ды хоць «Шклоўскае каралеўства»…
Майдан актывізавалі расейскія спецслужбы
Я ведаю жыццё ва Украіне. І калі пачаўся Майдан, я зразумеў, што людзей проста давялі. Майдан зрабіў не Захад, а фактычна сам Януковіч. А актывізавалі расейскія спецслужбы, калі пачалі забіваць людзей. Сёння не звяртаць увагі на Украіну нельга. І я не разумею засілля расейскай прапаганды. Казакі, іншыя чарнасоценцы цяпер актывізуюцца. Куды глядзяць спецслужбы? Я згодзен, калі Расію параўноўваюць з гітлераўскай Германіяй. Гэта так.
Cёння сітуацыя з Украінай дакладна паказала, што такое Расія, і якія людзі там жывуць, і якія людзі кіруюць. Крэмль гвалціў краіну яшчэ ў савецкія часы і працягвае рабіць гэта і цяпер. І дзіўна, але шмат каму гэта падабаецца. І не трэба казаць, што раней мы жылі ў брацкай згодзе, не. Успомніце хаця б бясконцыя «газавыя войны». І сёння Расія паціху захоплівае нас, хаця б эканамічна.
Лукашэнка ўсё ведае, і ён лавіруе. Ён ведае і пра тое, што большасць у Беларусі падтрымлівае Расію, і ўсё астатняе. Але ён не можа рэзка парваць з Пуціным і павярнуцца на Захад. Сёння вельмі небяспечная сітуацыя, трэба паводзіць сябе разумна, што і робіць Лукашэнка.
Трэба падзякаваць прэзідэнту, што ён не падтрымаў анексію Крыма, не прызнаў незалежнасць Абхазіі.
Трэба цвяроза глядзець на сітуацыю, а не імкнуцца звяргаць кіраўніка Беларусі. Бо калі не Лукашэнка, то хто? Я не ведаю.
***
Аляксандр Новікаў нарадзіўся ў 1951 у Гомелі. Удзельнік афганскіх падзей: 1986—1988, дарадца. Мае дзве вышэйшыя адукацыі: матэматык (1978); псіхолаг, практычны псіхолаг (1999). Больш за дзесяць гадоў — памочнік даверанай асобы прэзідэнта Рэспублікі Беларусь, члена савета рэспублікі (1998—2008). Працяглы перыяд вёў прыватную псіхалагічную практыку. Публікаваўся ў часопісах «Беларуская думка», «Белая вежа». Аўтар і кіраўнік беларускага літаратурнага партала «ЛітКрытыка.by».
