Радыё Свабода
Сёння ў судзе Заводскага раёна Мінска абвешчаны прыгавор па справе аб незаконнай прадпрымальніцкай дзейнасці ў складзе злачыннай групоўкі з атрыманнем даходаў у асабліва буйным памеры (ч. 3 арт. 233 КК). Асаблівая ўвага да працэсу выкліканая тым, што на лаве падсудных апынуўся Дзяніс Замяталін — сын былога галоўнага ідэолага краіны Уладзіміра Замяталіна.
Разам з Дзянісам Замяталіным у стварэнні лжэпрадпрымальніцкіх структур, абарот якіх перавысіў 100 млрд. рублёў, абвінавачваліся Юрый Клімовіч, Аляксей Саган, Анатоль Падпратаў, Аляксандр Іваноў, Іван Макаранка і Аляксандр Бясклубны.
Паводле звестак следства, Дзяніс Замяталін быў адным з арганізатараў злачыннай групоўкі, якая з 2008 па 2010 год нібыта займалася незаконнымі фінансавымі аперацыямі, у тым ліку прадстаўляла фальшывыя справаздачы аб уплаце падаткаў. Яму і іншым абвінавачваным былі выстаўлены грашовыя іскі на агульную суму ў 81,3 млрд. у якасці спагнання даходаў, атрыманых злачынным шляхам.
Усе сямёра вінаватымі сябе не прызнаюць і мяркуюць, што доказы сфальсіфікаваныя следствам, як не прызналі і вылучаных іскаў.
Суд прыгаварыў Замяталіна да пазбаўлення волі тэрмінам на пяць з паловай гадоў у калоніі ўзмоцненага рэжыму з канфіскацыяй маёмасці і забаронай займацца прадпрымальніцкай дзейнасцю на працягу пяці гадоў.
Такое ж пакаранне вынесена Клімовічу.
Саган і Падпратаў прыгавораныя да пазбаўлення волі тэрмінам на тры з паловай гады ў калоніі ўзмоцненага рэжыму з канфіскацыяй маёмасці і забаронай займацца прадпрымальніцкай дзейнасцю на працягу пяці гадоў.
Іваноў і Макаранка прыгавораныя да двух гадоў пазбаўлення волі ў калоніі ўзмоцненага рэжыму з канфіскацыяй маёмасці і забаронай займацца прадпрымальніцкай дзейнасцю на працягу пяці гадоў.
Бясклубны атрымаў пакаранне ў выглядзе трох з паловай гадоў пазбаўлення волі ў калоніі строгага рэжыму з канфіскацыяй маёмасці і забаронай займацца прадпрымальніцкай дзейнасцю на працягу пяці гадоў.
Паводле пастановы суда ўсім абвінавачваным была зменена мера стрымання з падпіскі аб нявыездзе на ўзяцце пад варту ў зале суда. Паколькі Саган і Клімовіч на вынясенне прыгавору не з'явіліся, яны будуць аб'яўленыя ў вышук.
Варта зазначыць, што Замяталін і раней знаходзіўся пад вартай, бо праходзіць абвінавачваным па яшчэ адной справе, якая слухаецца ў гэтым жа судзе, — аб атрыманні хабару.
У дачыненні да Іванова суд пастанавіў прымяніць прымусовыя меры лячэння ад алкагалізму ў месцы адбывання пакарання.
Суд таксама задаволіў грамадзянскі іск да абвінавачваных на суму 81,3 млрд. рублёў.
Дзяржабвінаваўца, маці і жонка Дзяніса Замяталіна, якая таксама з'яўляецца яго адвакатам, ад каментарыяў адмовіліся.
Варта зазначыць, што гэты судовы працэс — другі па гэтай справе аб незаконнай прадпрымальніцкай дзейнасці. Першы быў у 2010 годзе. Тады Дзяніс Замяталін правёў пад вартай два месяцы і да суда быў вызвалены пад падпіску аб нявыездзе. У 2012 годзе яго і іншых фігурантаў раённы суд апраўдаў, але пракуратура абскардзіла гэта рашэнне. Мінгарсуд пацвердзіў вердыкт суда першай інстанцыі, а Вярхоўны суд яго адмяніў і адправіў справу на новы разгляд. У ліпені 2013 года Замяталіна зноў узялі пад варту.
Яго бацька Уладзімір Замяталін прыйшоў у вялікую палітыку ў 90-я гады з прэс-службы Міністэрства абароны. Ён уваходзіў у каманду прэм'ер-міністра Беларусі Вячаслава Кебіча на першых прэзідэнцкіх выбарах 1994 года. У паслужным спісе Замяталіна былі пасады старшыні Дзяржкамітэта па друку, віцэ-прэм'ера, які адказваў за пытанні культуры, адукацыі, рэлігіі і нацыянальных меншасцяў, намесніка кіраўніка Адміністрацыі прэзідэнта па пытаннях ідэалогіі. Пасля гэтага Уладзімір Замяталін працаваў у банкаўскай сферы, а ў 2006—2010 гадах быў гендырэктарам «Беларусьфільма».
