Пра гэта паведамілі ў галоўным упраўленні спажывецкага рынку Мінгарвыканкама.
Так, 2 мая ў Мінску пройдзе «Адзіны дзень скідак», у час якога нехарчовыя тавары ў многіх магазінах патаннеюць на 15-20 працэнтаў. Напярэдадні Дня Перамогі кожнае гандлёвае прадпрыемства горада прапануе індывідуальную сістэму скідак. Напрыклад, ЦУМ і ўнівермаг «Беларусь» прадаставяць 15-працэнтныя скідкі на ўсе нехарчовыя тавары ветэранам ВАВ і прыраўнаваным да іх асобам з 1 па 15 мая. ГУМ правядзе акцыю «Шчодрыя дні ў ГУМе да Дня Перамогі» 7 і 8 мая, падарыўшы сваім пакупнікам скідку ў памеры 15 працэнтаў на нехарчовыя тавары і 5 працэнтаў — на харчовыя. Гандлёвы дом «На Нямізе» ўручыць кожнаму ветэрану ВАВ дысконтную картку. Тавары па спецыяльных цэнах і ў растэрміноўку ў маі будуць прадаваць розныя сеткавыя магазіны.
Акцыі з прадастаўленнем скідак у маі правядуць ААТ «ККХ «Гарызонт» (5-10 працэнтаў на бытавую тэхніку), ЗАТ «Атлант» (10 працэнтаў), ААТ «Электраапаратура» (5-10 працэнтаў), ААТ «Мінскі механічны завод імя С.І.Вавілава» ККХ БелОМА (6-10 працэнтаў), ГУП «Керамін-Сталіца» акажа адрасную дапамогу ветэранам, а таксама знізіць цэны на 10 працэнтаў. Адпускныя цэны на прадукцыю ў майскія святы на 5-30 працэнтаў упадуць і ў асобных вытворцаў тавараў лёгкай прамысловасці.
Напярэдадні святкавання 70-годдзя Перамогі мноства мерапрыемстваў правядуць вытворцы харчовай прамысловасці. Так, ААТ «Мінск Крышталь», ААТ «Белрыба», КУП «Мінскхлебпрам», ААТ «Мінскі камбінат хлебапрадуктаў», СААТ «Камунарка», ААТ «Кандытарская фабрыка «Слодыч», ААТ «Мінскі малочны завод нумар 1» вырабяць і паставяць у гандлёвую сетку прадукцыю з юбілейнай сімволікай. Акрамя таго, у рознічнай гандлёвай сетцы і сетцы фірменнага гандлю будуць праведзены акцыі са зніжэннем цаны і выстаўкі-дэгустацыі прадукцыі.
