 Андрэй Хадановіч |
7 лютага Андрэй Хадановіч запрашае на паэтычна‑музычную акцыю «МЭДЫЮМ» ў Акадэмію Мастацтва
а 19:30. У праграме — прэзэнтацыя кнігі вершаў «Бэрлібры» і аўдыёкнігі «Абменьнік».
У сэрыі «Дыскарня «Наша Ніва» выйшаў першы дыск мэлядэклямацый пад назвай «Абменьнік». Дакладней, сама дыскарня распачалася менавіта гэтым дыскам. Вершы эўрапейскіх паэтаў ва ўласным перакладзе на беларускую чытае Андрэй Хадановіч. Гучаць у «Абменьніку» вершы і самога перакладчыка. Дарэчы, менавіта першы ў нізцы кампазыцый верш Андрэя Хадановіча і даў назву дыску, падкрэсьліўшы тым самым інтэрнацыянальны склад паэтаў . Канцэпцыі «Абменьніка» як сродку беларуска‑эўрапейскага культурнага сымбіёзу падпарадкавана й арыгінальнае афармленьне.
Дарэчы, ідэя праекту, як і яго ўвасабленьне ў жыцьцё належыць паэту Дзьмітрыю Дзьмітрыеву. Ён жа і рэжысэр. Па словах заснавальніка праекту, мэлядэклямацыя — гэта ня проста вершы, выкананыя пад музыку. Гэта асаблівы жанар мастацва, дзе музыка ня толькі суправаджае, але і падтрымлівае ідэю вершу, дзе музыка зьяўляецца раўнапраўным удзельнікам мініспэктаклю. Разам з аўтарам вы трапіце на сапраўдны блышыны рынак, уначы пракрадзецеся ў гарэм ці будуар часоў рэнэсансу, альбо пад размову гастарбайтэраў у цягніку ўзгадаеце пра леташні адпачынак ў Пэнсыльваніі, дзе, магчыма, вы ніколі й не былі.
Цягам 45 хвілін у праграме гучаць вершы Андрэя Хадановіча, Канстанты Ільдэфанс Галчынскага, Альвідаса Шляпікаса, Джона Дона, Юрыя Андруховіча, Марыса Карэма.
«Абменнікам» распачынаецца сэрыя дыскаў з мэлядыклямацыямі беларускіх паэтаў. Ужо неўзабаве выйдзе ў сьвет другі дыск мэлядэклямацый «Phantom Of The Literature» з творамі Джэці (Веры Бурлак) у аўтарскім выкананьні. У найбліжэйшых плянах — яшчэ дзьве праграмы зь вершамі Віктара Жыбуля і Вальжыны Морт.
