На білбордах і тэлерэкламе, якія ў апошнія гады сталі звыклымі, можна бачыць рэкламу пітной вады, якую вельмі цяжка знайсці ў мясцовых крамах, затое там вельмі лёгка знайсці гарэлку пад такой жа назвай, напісаў нам чытач Павел Магілін з Барысава.
Зразумела, гэта зусім не барысаўскае і нават не беларускае ноу-хау. Пітная вада «Налібокі» і «Сваяк» — так званыя «парасонавыя брэнды» алкагольнай прадукцыі. Адзінае афармленне ўпакоўкі (ключавымі элементамі ў такіх выпадках з'яўляюцца лагатып і назва) дазваляе павялічваць продаж гарэлкі, рэкламуючы выпушчаную малымі партыямі мінеральную ваду.
У Расіі яшчэ ў 2006 годзе забаранілі выкарыстоўваць парасонавыя брэнды для рэкламы тавараў, рэклама якіх забароненая. У Беларусі ў 2013 годзе тэлевізійная рэклама пітной вады «Сябры» прызнаная Міністэрствам гандлю схаванай рэкламай гарэлкі, што вырабляецца пад аналагічным назвай. Тэлеканалам і рэкламадаўцу былі накіраваныя прадпісанні аб спыненні распаўсюджвання дадзенай рэкламы.
22 кастрычніка мінулага года Палата прадстаўнікоў РБ прыняла ў першым чытанні законапраект аб забароне рэкламы прадуктаў харчавання пад тытунёвымі і алкагольнымі брэндамі.
Тым не менш, у Барысаве, дзе перыядычна аб'яўляюць п'янству бой, ўводзяць чацвяргі цвярозасці і праводзяць іншыя мерапрыемствы ў гэтым кірунку, працягваюць рэкламаваць гарэлку проста на вуліцах.
З пункту гледжання эканамічнай мэтазгоднасці пазіцыю мясцовых уладаў, якія дазваляюць такую рэкламу, можна зразумець — вытворцы алкагольнай прадукцыі ўносяць важкі ўклад у бюджэт усёй Мінскай вобласці. А з пункту гледжання закона?
Сітуацыю пракаментаваў юрыст Алег Мацкевіч: «Закон «Аб рэкламе» вызначае любую ўтоеную рэкламу як неналежную. Неналежная рэклама не дапускаецца.
Арт. 26 Закона «Аб рэкламе» вызначае, што не дапускаецца выкарыстанне і размяшчэнне (распаўсюджванне) іншымі спосабамі схаванай рэкламы, гэта значыць рэкламы, якая аказвае ўздзеянне на ўспрыманне спажыўца рэкламы, што не ўсведамляецца ім, у радыё-, тэле-, відэа-, аўдыё- і кінапрадукцыі, а таксама ў іншай прадукцыі (у тым ліку на білбордах).
Мясцовыя выканаўчыя і распарадчыя органы ў адпаведнасці з нормамі названага Закона з'яўляюцца органамі, якія ажыццяўляюць дзяржаўнае рэгуляванне ў галіне рэкламы, і ў межах сваёй кампетэнцыі павінны папярэджваць факты неналежнай рэкламы (арт. 5, 9)».
Здымкі зробленыя на вуліцы Гагарына і ў барысаўскіх крамах.
