Учора былі падведзеныя вынікі штогадовага конкурса «Тэлевяршыня».
Яго ладзяць Міністэрства інфармацыі супольна з Нацыянальнай дзяржаўнай тэлерадыёкампаніяй Рэспублікі Беларусь, ЗАТ «Другі нацыянальны тэлеканал», ЗАТ «Сталічнае тэлебачанне». А для ўдзелу ў конкурсе прымаюцца тэлепраграмы любой працягласці вытворчасці рэспубліканскіх і рэгіянальных тэлеканалаў.
Учора былі падзведзеныя вынікі конкурса, названыя пераможцы. Гран-пры «Тэлевяршыні» атрымаў калектаў Белтэлерадыёкампаніі за асвятленне Чэмпіянату свету па хакеі ў Мінску. Узнагароджваў пераможцаў памочнік прэзідэнта па пытаннях спорту Максім Рыжанкоў.
Звяртаюць на сябе іншыя намінацыі. Так найлепшай вядучай інфармацыйных перадач стала Паліна Шуба. Вядомасць Паліны Шубы пачалося пасля таго, як дзяўчына з’явілася ў кампаніі Аляксандра Лукашэнкі на матчы адкрыцця чэмпіянату свету па хакеі.
Пасля расійская журналістка Ксенія Сабчак пацікавілася ў Лукашэнкі пра Паліну Шубу. Пасля ў інтэрнэце ўсплыў фотаздымак, дзе Лукашэнка гасціць у цешчы Алены Жаўняровіч. У нефармальнай абстаноўцы яго суправаджаюць старэйшы сын Віктар, мільянер Шакуцін, тэнісны трэнер Цяцерын, спявачка Алёна Ланская, а таксама тэлевядучая Паліна Шуба.
Год таму «Наша Ніва» падрабязна пісала аб гісторыі поспеху Паліны Шубы. Цяпер дзяўчына вядзе вечаровую «Панараму» на «Беларусь-1».
Найлепшай перадачай грамадска-палітычнай тэматыкі названы ток-шоу «Справа прынцыпа», якую вядзе галоўны рэдактар часопіса «Беларуская думка» Вадзім Гігін. Праграма маніпулятыўная, але варта адзначыць, што Гігін першым на беларускім тэлебачанні стаў клікаць туды прадстаўнікоў незалежнага грамадства.
Найлепшай праграмай для дзяцей названая беларускамоўная «Дабраранак», што выходзіць на тэлеканале «Беларусь-3».
