Пра гэта сёння паведаміў Аляксандру Лукашэнку прэм'ер-міністр Андрэй Кабякоў.
Лукашэнку цікавіла бягучая сітуацыя ў эканоміцы, у якой намеціліся пазітыўныя тэндэнцыі. «Калі раней мы выкідалі валюту, «палілі» золатавалютныя рэзервы, то сёння папаўняем іх. Юрыдычныя і фізічныя асобы прадаюць валюту. Гэта працэс добры», — канстатаваў кіраўнік дзяржавы.
Лукашэнка падкрэсліў, што манетарная, валютная палітыка павінны забяспечваць развіццё эканомікі. «Але гэта не значыць, што мы павінны адысці ад жорсткай палітыкі», — сказаў кіраўнік дзяржавы. Крэдытавацца павінны такія праекты, каб вырабленая прадукцыя магла быць гарантавана рэалізаваная. «Калі гэтага няма — грошай няма», — адзначыў кіраўнік дзяржавы.
Прадпрыемствы, у якіх заключаны кантракты, змогуць узяць крэдыты нават пад абаротныя сродкі, хоць і на невялікі тэрмін. «Тут выдумляць нічога не трэба. Мы ад гэтага адыходзіць не павінны», — дадаў кіраўнік дзяржавы.
Ён нагадаў, што ў свой час папярэджваў урад, кіраўнікоў пра тое, што часу на разварушванне няма.
«Нават, я б сказаў, не на разварушванне, а на тое, каб «зарадзіць» і потым «стрэліць» у канцы жніўня — пачатку верасня. Засталося ўсяго два месяцы. Мы не можам людзей пакінуць без працы. У адваротным выпадку людзям і дзяржава такая не трэба», — заўважыў Аляксандр Лукашэнка.
Кіраўнік дзяржавы канстатаваў, што з-за абвалу расійскіх рынкаў, санкцый, эмбарга, беларуская эканоміка страціла амаль $3 млрд.
Аляксандр Лукашэнка звярнуў увагу, што Расія аказвае Беларусі сістэматычную падтрымку, бакі дамовіліся сумесна шукаць выйсце з сітуацыі. Прэм'ер-міністр паведаміў, як ідзе праца ў гэтым кірунку.
Акрамя таго, Андрэй Кабякоў праінфармаваў Лукашэнку аб ходзе нарыхтоўкі кармоў.
«Вясна вельмі добрая. Мы не павінны спазніцца з нарыхтоўкай кармоў. Як раней казалі, адзін дзень год корміць. Сёння пачалася такая пара», — падкрэсліў Аляксандр Лукашэнка.
Кіраўнік дзяржавы запатрабаваў, што ўрад і профільнае міністэрства надалі гэтаму пытанню асаблівую ўвагу, каб сёлетні ўраджай кармоў быў нарыхтаваны ў поўным аб'ёме.
Лукашэнка дадаў, што ў бліжэйшы час асабіста праінспектуе ход кормаўборачнай кампаніі ў краіне.
Прэм'ер-міністр падчас дакладу нагадаў, што ў снежні мінулага года былі рэалізаваны вымушана жорсткія меры, якія дазволілі адаптаваць эканоміку да існавання ў новых умовах.
Прадугледжаныя прагнозам сацыяльна-эканамічнага развіцця цана на нафту і курс расійскага рубля да даляра прыкметна адрозніваліся ад фактычных паказчыкаў у I квартале. Прынятыя меры не маглі не адбіцца на валавых паказчыках эканомікі, перш за ўсё на ВУП, але яны далі свой вынік, забяспечыўшы спакойную, кіраваную, прадказальную сітуацыю на ўнутраным валютным рынку і з цэнамі.