фота Дзмітрыя Ражкова, Tut.by
Былы генеральны дырэктар ААТ «Барысаўдрэў» Уладзімір Мальцаў 2 ліпеня вызваліўся па амністыі з магілёўскай папраўчай калоніі агульнага рэжыму № 15.
Ён выйшаў з калоніі каля 16.00. Мальцава сустракалі жонка, бацька і брат.
фота Дзмітрыя Брушко, Tut.by
фота Дзмітрыя Брушко, Tut.by
Як стала вядома БелаПАН, рашэнне аб вызваленні Мальцава было прынятае 1 ліпеня камісіяй па прымяненні амністыі, якая засядала ў магілёўскай калоніі, а сёння раніцай — зацверджанае пракурорам.
Гендырэктар «Барысаўдрэва» быў затрыманы ў сакавіку 2014 года. У снежні Мінскі абласны суд прызнаў яго вінаватым у злоўжыванні ўладай ці службовымі паўнамоцтвамі і прыгаварыў да трох гадоў пазбаўлення волі ў калоніі ўзмоцненага рэжыму. Акрамя таго, Мальцава абавязалі вярнуць прадпрыемству 1 млрд. 906 млн. рублёў. На пагашэнне доўгу павінна была быць накіраваная ўся раней арыштаваная асабістая маёмасць былога гендырэктара.
У красавіку гэтага года Вярхоўны суд Беларусі перакваліфікаваў абвінавачанне Мальцаву на мякчэйшае і скараціў яму тэрмін пазбаўлення волі да двух з паловай гадоў у калоніі агульнага рэжыму. З рашэння суда першай інстанцыі таксама было выключана абвінавачанне ў нанясенні «Барысаўдрэву» ўрону.
Акрамя таго, Мальцаў падпаў пад дзеянне адразу дзвюх амністый — 2014 і 2015 гадоў, у выніку чаго тэрмін яго пакарання скараціўся яшчэ на адзін год.
Варта зазначыць, што крымінальная справа Уладзіміра Мальцава атрымала шырокі грамадскі рэзананс. Ён быў прызначаны на пасаду гендырэктара ААТ «Барысаўдрэў» асабіста прэзідэнтам падчас наведвання Аляксандрам Лукашэнкам барысаўскага прадпрыемства ў лістападзе 2012 года. Абураны сітуацыяй з мадэрнізацыяй «Барысаўдрэва», Лукашэнка тады распарадзіўся звольніць былога кіраўніка і прызначыць замест яго Уладзіміра Мальцава, які займаў пасаду намесніка гендырэктара па тэхнічным узбраенні. Такім чынам, да свайго арышту ў сакавіку 2014-га Мальцаў кіраваў прадпрыемствам усяго паўтара года.
На прэс-канферэнцыі 29 студзеня 2015 года Лукашэнка, адказваючы на пытанне, ці не лічыць ён, што прыгавор, вынесены былому гендырэктару «Барысаўдрэва», занадта жорсткі, заявіў, што не быў прыхільнікам жорсткага пакарання Мальцава і паабяцаў асабіста азнаёміцца з падрабязнасцямі яго крымінальнай справы.
Згадаўшы неадназначную рэакцыю грамадскасці на крымінальны пераслед былога кіраўніка барысаўскага прадпрыемства, Лукашэнка заявіў: «Я папярэдзіў праваахоўныя органы: нягледзячы на тое, што я вельмі незадаволены мадэрнізацыяй у Барысаве, што там безгаспадарчасці хапала, нельга падстройвацца ў гэтым плане і ламаць лёс чалавеку. Таму вы, ад следчага да суда, адказваеце перад кіраўніком дзяржавы, каб рашэнне ваша было законным. Я іх папярэдзіў».
Непасрэдна падчас прэс-канферэнцыі Лукашэнка даручыў кіраўніку сваёй адміністрацыі падаць яму падрабязную інфармацыю па справе Мальцава з тлумачэннем, чаму яму быў вынесены менавіта такі прыгавор.
