Удзельнікі прарасійскай канферэнцыі ў Мінску патрабуюць вярнуць від бюсту Пушкіна ў Магілёве з «імперскімі радкамі»
Васямнаццаць удзельнікаў міжнароднай канферэнцыі «Расія і славянскія народы ў войнах і ваенных канфліктах XIX—XX стагоддзяў», якая прайшла 28 чэрвеня ў Мінску, запатрабавалі вярнуць тэкст верша «Паклёпнікам Расіі» на пастамент бюста паэта Аляксандра Пушкіна ў Магілёве.
Нагадаем, 6 чэрвеня, у дзень нараджэння вялікага паэта, у Магілёве каля вучэбнага корпуса бібліятэчнага каледжа, які носіць яго імя, быў урачыста адкрыты бюст. На яго пастаменце быў выбіты ўрывак з пушкінскага твору «Паклёпнікам Расіі», які пачынаецца са слоў «Иль нам с Европой спорить ново, иль русский от побед отвык?». Пасля хвалі абурэнняў неабыякавых да гісторыі Беларусі грамадзян, якія ўгледзелі ў гэтых словах агрэсіўнае стаўленне Расіі да іншых народаў і краін, магілёўскія ўлады прынялі рашэнне выдаліць надпіс, што і было зроблена 12 чэрвеня.
«Дзеянні па «редагаванні» тэксту на помніку — не што іншае, як спроба цэнзуры вялікага паэта праз 178 гадоў пасля яго смерці», — гаворыцца ў звароце ўдзельнікаў канферэнцыі з Беларусі і Расіі, накіраваным міністру культуры Беларусі Барысу Святлову.
Падпісанты адзначаюць, што «беспрэцэдэнтны выпадак, які адбыўся ў Магілёве, побач з якім гасне павальнае знішчэнне помнікаў савецкай эпохі ва Украіне, ужо нанёс велізарны маральны ўрон мільёнам беларускіх грамадзян». Такі ж урон, на іх думку, будзе нанесены і міжнароднаму іміджу Беларусі.
Аўтары звароту просяць міністра культуры асабіста разабрацца ў абставінах здарэння.
«Спадзяемся, што помніку Аляксандру Сяргеевічу Пушкіну вярнуць яго першапачатковы выгляд, і больш на беларускай зямлі не паўторыцца штосьці падобнае», — гаворыцца ў дакуменце, размешчаным на сайце прарасійскага праекта «Заходняя Русь».
Крутога айцішніка, які вярнуўся з Польшчы, кінулі за краты за фінансаванне «экстрэмізму»25
Каментары