Французскі гоншчык «Формулы-1» Жуль Б'янкі, які ў мінулым годзе атрымаў цяжкія траўмы ў выніку аварыі на Гран-пры Японіі, памёр вечарам у пятніцу.
25-гадовы гоншчык, які выступаў за каманду «Маруся», быў у коме з 5 кастрычніка.
У складаных умовах надвор'я Б'янкі вылецеў з трасы і на хуткасці больш за 200 км/г урэзаўся ў эвакуатар, атрымаўшы сур'ёзную чэрапна-мазгавую траўму.
«Жуль, як заўсёды, змагаўся да канца, але сёння яго бітва завяршылася», — гаворыцца ў заяве бацькоў Б'янкі.
Гоншчык памёр ва ўніверсітэцкай бальніцы Ніцы непадалёк ад іх дома.
У камандзе «Маруся», якая цяпер выступае пад назвай «Манор», заявілі, што «спустошаныя» горам.
«Мы дзякуем калегам Жуля, сябрам, фанатам і ўсім, хто праяўляў цёплыя пачуцці ў адносінах да яго ў апошнія месяцы. Гэта дало нам вялікую сілу і дапамагло даваць рады ў такія складаныя часы», — гаворыцца ў заяве бацькоў Б'янкі.
Б'янкі дэбютаваў у «Формуле-1» у складзе каманды «Маруся» ў 2013 годзе. Ён таксама быў членам акадэміі маладых кіроўцаў Ферары і ў мінулым працаваў у гэтай камандзе ў якасці тэст-пілота.
Ён стаў першым гоншчыкам «Формулы-1», які загінуў ад траўмаў, атрыманых пры аварыі, пасля трохразовага чэмпіёна свету бразільца Айртана Сены, які загінуў у італьянскай Імале ў 1994 годзе.
На трасе ў японскай Судзукі Б'янкі урэзаўся ў эвакуатар, які прыбіраў балід нямецкага гоншчыка Адрыяна Суціля, які разбіўся на тым жа месцы на папярэднім коле.
Пасля навіны пра смерць Б'янкі іншыя гоншчыкі «Формулы-1» выказалі спачуванні яго сям'і ў сацсетках.
