Беларускае прадпрыемства «Пеленг» пачало прадаваць свае прылады для кіравання агнём 1К118П для супрацьтанкавых самаходных комплексаў Хрызантэма-С, паведаміў інтэрнэт-рэсурс «Вестник Мордовии».
Хрызантэма-С
Стабілізаваны ў дзвюх плоскасцях цеплавізійны прыцэл дапамагае адшукваць, ідэнтыфікаваць і весці цэлі ўдзень і ўночы, можа фарміраваць лазернае поле кіравання для навядзення кіраваных ракет. Кошт прыцэла невядомы.
Раней прыцэлы для Хрызантэм-С рабіў украінскі завод «Фотапрыбор», які ўваходзіць у дзяржаўны канцэрн «Украбаронпрам». Аднак у сувязі з агрэсіяй РФ супраць Украіны сувязі з расейскімі кліентамі былі разарваныя.
Хрызантэма-С (па класіфікацыі НАТА — AT-15 Springer) складаецца з шасі баявой машыны пяхоты БМП-3 і супрацьтанкавага ракетнага комплексу з ракетамі 9М123, якія маюць тандэмна-кумуляцыйныя ці фугасна-тэрмабарычныя баявыя часткі.
Экіпаж складаецца з двух чалавек, у машыне знаходзяцца 15 ракет. Працэс стральбы цалкам аўтаматызаваны. Лічыцца, што ракеты 9М123 маюць дальнасць дзеяння ад 400 да 5000 м пры навядзенні па лазерным промні і ад 400 да 6000 м пры навядзенні па радыёканале. Звышгукавыя супрацьтанкавыя ракеты маюць, паводле дадзеных вытворцы, бронепрабівальнасць 1000-1100 мм за дынамічнай абаронай. Трацілавы эквівалент фугаснай ракеты — 13,5 кг.
