Сродкі дзяржаўнага расійскага крэдыту ў $760 млн паступілі на рахунак Міністэрства фінансаў Беларусі.
«28 ліпеня на рахунак Міністэрства фінансаў паступілі сродкі дзяржаўнага фінансавага крэдыту ў адпаведнасці з пагадненнем паміж урадам Рэспублікі Беларусь і ўрадам Расійскай Федэрацыі аб выдзяленні ўраду Беларусі дзяржаўнага фінансавага крэдыту», — гаворыцца ў паведамленні беларускага Мінфіна.
Пагадненне аб выдзяленні гэтага крэдыту было падпісанае 24 ліпеня ў Маскве. Дакументам прадугледжанае выдзяленне фінансавых рэсурсаў у расійскіх рублях на $760 млн на 10 гадоў, уключаючы чатырохгадовы льготны перыяд.
Крэдыт даецца ў расійскіх рублях паводле курсу Цэнтрабанка Расіі на дату падпісання пагаднення для пагашэння і абслугоўвання ў гэтым годзе дзярждоўгу Беларусі перад РФ і Еўразійскім фондам стабілізацыі і развіцця.
Улік завінавачанасці па крэдыце вядзецца ў далярах ЗША. Беларусь павінна выплачваць крэдыт 13 роўнымі паўгадавымі долямі 15 лютага і 15 жніўня кожнага года, прычым першы плацеж будзе зроблены 15 лютага 2019 года, апошні — 15 лютага 2025 года.
Беларускі бок выплачвае расійскаму боку за карыстанне крэдытам працэнты па стаўцы LIBOR для шасцімесячных дэпазітаў у далярах ЗША, павялічанай на маржу. Памер маржы фіксуецца ў працоўны дзень, што папярэднічае дню падпісання пагаднення, і вызначаецца як розніца паміж даходнасцю расійскіх еўрааблігацый з пагашэннем праз сем гадоў і стаўкай сямігадовага працэнтнага свопу ў далярах.
Раней у гэтым годзе Беларусь ужо атрымала ад Расіі крэдыт у $110 млн у эквіваленце на пагашэнне працэнтаў па расійскім крэдыце, выдзеленым у 2010 годзе.
