 |
Генеральны дырэктар А‑ONE у Беларусі Алег Скарабагаты кажа:
‑ Мы не маглі не зацікавіцца такім мерапрыемствам, як «Рок‑Каранацыя», бо гэта музыка — аснова нашага музычнага вяшчання.
Як паведаміў яго намеснік Сяргей Курыловіч, яны вырашылі ўзнагародзіць адзін з беларускіх гуртоў адмысловым прызом — абранаму выканаўцу будзе ўручаны адпаведны сертыфікат, які гарантуе прасоўванне і шчыльную ратацыю яго відэа на тэлеканале А‑ONE.
Поўная назва каналу А‑ONE гучыць, як Першы альтэрнатыўны музычны канал. Са слоў кіраўніцтва каналу, ён быў створаны каб «прадэманстраваць Вялікую Хвалю супраціву аднастайнасці, манафарматнасці і прымітыву». Вяшчанне А‑ONE ў Расіі распачалося параўнальна нядаўна — у 2005 годзе, а свой выхад у этэр тэлеканал адзначыў уручэннем прэміі RAMP (Rock Alternative Music Prize), якая стала адной з галоўных падзеяў у расійскай музыцы. У розныя гады гасцямі гэтай цырымоніі былі такія выканаўцы,як Korn, Stone Sour, Marylin Manson. А на апошняй прэміі ў Маскве сярод пераможцаў прэміі аказаліся і беларусы — у намінацыі «Кліп году» было адзначана відэа Аляксея Церахава на песню «Капітал».
Кіраўніцтва толькі створанага беларускага прадстаўніцтва А‑ONE лічыць «Рок‑Каранацыю» знакавай падзеяй.
‑ Мы рады, што ўрэшце сёлета ўсе лепшыя беларускія гурты выступяць на адной сцэне.
Менавіта на А‑ONE можна будзе пабачыць тэлеверсію цырымоніі «Рок‑Каранацыя‑2007».
