Падрыхтоўчы этап праекту газаправода South Stream («Паўднёвая плынь») з Расеі ў Эўропу праз Чорнае мора, у абыход Украіны завершаны. Але яго могуць напаткаць новыя праблемы, паведамляе ўкраінскі выпуск «Коммерсанта». Справа ў тым, што марскі ўчастак газаправоду пройдзе праз эканамічную зону Ўкраіны, што можа быць выкарыстана ўкраінскім дзеля ціску на Расею ў сьвятле новага энэргетычнага скандалу. Як вядома, 26 лютага афіцыйны прадстаўнік «Газпрому» Сяргей Купрыянаў паведаміў, што ў сувязі зь неплацяжамі 3 сакавіка з 10:00 для спажыўцоў Украіны будуць скарочаныя на чвэрць пастаўкі газу.
«Забараніць пабудову газаправоду Ўкраіна ня можа, але яна павінна ўзгадніць маршрут трубаправода і яго экалягічную экспэртызу» — паведаміў намесьнік кіраўніка Мінпрамэнэрга Расеі Анатоль Яноўскі. Паводле заканадаўства Ўкраіны на экспэртызу і ўзгадненьне адводзіцца адзін год.
Украіна мае альтэрнатыўны варыянт паставак газу ў Эўропу, які, на думку кіраўніцы ўкраінскага ўраду Юліі Цімашэнка, можа паспрыяць дывэрсыфікацыі паставак газу ў краіны ЭС. Напрыканцы студзеня ў часе візыту ў Брусэль кіраўніца ўраду Ўкраіны Юлія Цімашэнка прапанавала Эўрасаюзу партнэрства ў рэалізацыі праекта «Белая плынь» («White Stream») па пастаўках газу ў Эўропу праз тэрыторыю Ўкраіны. Ідэя стварэньня «White Stream» зьявілася ў 2005 г. і заключаецца ў пабудове газаправоду з Туркмэністану праз Азэрбайджан у грузінскі порт Супса, і затым па дне Чорнага мора праз Крым у накірунку Эўрасаюзу.
South Stream пройдзе з Расеі ў Баўгарыю па дне Чорнага мора, дзе разьдзеліцца на дзьве галіны — праз Сэрбію і Вугоршчыну ў Аўстрыю і праз Грэцыю на поўдзень Італіі. Магутнасьць газаправода — 30 млрд куб. м газу з год. Згодна плянаў ён будзе пабудаваны ў 2012 годзн. Партнэрам расейскага «Газпрому» зьяўляецца італьянская кампанія «Eni».
