Інфляцыя ў Беларусі па выніках года не перавысіць прагнозу 18% плюс-мінус два працэнтныя пункты. Аб гэтым сёння журналістам паведаміў старшыня праўлення Нацыянальнага банка Павел Калаўр.
БелТА
Паводле ацэнак Нацбанка, індэкс спажывецкіх цэн не перавысіць прагнозаў, зробленых у пачатку года - 18% плюс-мінус два працэнтныя пункты. «Мы лічым, што можна чакаць інфляцыю не вышэй за сярэдні ўзровень прагнозу», — сказаў Павел Калаўр.
Ён адзначыў, што ў цэлым на рынках сёння назіраецца стабільная абстаноўка. «Палітыка Нацбанка праводзіцца на гібкай аснове, — нагадаў Павел Калаўр. — Ва ўмовах высокай нявызначанасці трэба своечасова ўмець рэагаваць на змяненні кан'юнктуры і асабліва на выклікі».
Што датычыцца планаў Нацыянальнага банка на перспектыву, старшыня праўлення расказаў, што падрыхтаваны ўжо неабходныя дакументы, па якіх Нацбанк будзе выконваць функцыі адзінага мегарэгулятара на фінансавым рынку. У бліжэйшы час гэтыя дакументы ўнясуць на разгляд кіраўніку дзяржавы. «Нацбанк акрамя выконваемых цяпер функцый будзе займацца рэгуляваннем страхавога і фондавага рынкаў. Мы ўнясём таксама прапановы па іх развіцці», - удакладніў Павел Калаўр.
