У Кіеве адкрыецца паўнавартаснае прадстаўніцтва НАТА. Адпаведны ўказ падпісалі міністр замежных спраў Украіны Павел Клімкін і генеральны сакратар альянсу Енс Столтэнберг. На цырымоніі падпісання прысутнічаў прэзідэнт Украіны Пятро Парашэнка.
«Гэта публічная, вельмі яркая дэманстрацыя той увагі і змены стаўлення з боку НАТА да Украіны», — заявіў Парашэнка на цырымоніі.
Да гэтага часу ва Украіне дзейнічаў толькі інфармацыйны цэнтр альянсу.
Таксама ў аўторак Украіна і НАТА склалі дарожную карту аб супрацоўніцтве ў сферы стратэгічных камунікацый і падпісалі сумесную дэкларацыю аб узмацненні тэхнічнага супрацоўніцтва.
«Гэта канкрэтныя крокі па супрацоўніцтве. Украіна цяпер мае патрэбу не ў смяротнай зброі, а ў магчымасці эфектыўнай абароны сваёй тэрыторыі, абароны нашай незалежнасці», — пракаментаваў падпісанне дакументаў Пятро Парашэнка.