У кастрычніку ў Магілёўскім абласным судзе пачнецца разгляд рэзананснай крымінальнай справы, аднымі з фігурантаў якой з`яўляюцца былыя чыноўнікі — першы намеснік старшыні Гомельскага аблвыканкама і намеснік старшыні аблвыканкама.
Як паведамілі ў Магілёўскім абласным судзе, усяго па крымінальнай справе праходзяць абвінавачванымі шасцёра чалавек: два намеснікі старшыні аблвыканкама, сын аднаго з іх — дырэктар прыватнага прадпрыемства, і сямейная пара з Расіі — ІП і яе муж, дырэктар ТАА. Яшчэ адзін абвінавачваны — былы дырэктар холдынгу «Гомельская мяса-малочная кампанія». Летам 2015 года ён быў асуджаны ў Гомелі за карупцыйнае злачынства, не звязанае з гэтай крымінальнай справай.
Справа аб`ёмная — 90 тамоў, дзве з якіх утрымліваюць абвінавачванне.
Нагадаем, два намеснікі старшыні Гомельскага аблвыканкама былі затрыманыя 19 мая 2014 года па падазрэнні ва ўчыненні карупцыйных злачынстваў. Ніякіх падрабязнасцяў справы СК не аб`яўляў. Следства цягнулася больш як год.
Першы намеснік старшыні аблвыканкама абвінавачваецца ва ўчыненні злачынстваў, прадугледжаных ч. 3 арт. 426 КК (перавышэнне ўлады або службовых паўнамоцтваў). Намеснік старшыні аблвыканкама абвінавачваецца па аналагічным артыкуле, а таксама ч. 6 арт. 16 арт. 209 КК (дапамаганне ў злачынстве, махлярства), і ч. 5 арт. 16 арт. 424, арт. 426 КК (падбухторванне да ўчынення злачынства, перавышэнне ўлады, злоўжыванне ўладай).
Сын намесніка старшыні аблвыканкама, дырэктар прыватнай фірмы, абвінавачваецца па ч. 2 арт. 216 КК (нанясенне маёмаснага ўрону без прыкметаў крадзяжу), ч. 4 арт. 209 КК (махлярства групай асоб або ў буйным памеры), ч. 5 арт. 16 ч. 3 арт. 426 КК, ч. 5. арт. 16 арт. 424 КК (падбухторванне да ўчынення перавышэння ўлады і злоўжывання ўладай).
Былы кіраўнік холдынгу «Гомельская мяса-малочная кампанія» абвінавачваецца па ч. 3 арт. 424 КК (злоўжыванне ўладай).
Грамадзянка РФ, індывідуальны прадпрымальнік, абвінавачваецца ў махлярстве, нанясенні маёмаснага ўрону, падбухторванні да ўчынення карупцыйных злачынстваў. Яе муж, таксама расіянін, дырэктар фірмы, абвінавачваецца па аналагічных артыкулах.
У ліпені 2015 года былы кіраўнік холдынгу «Гомельская мяса-малочная кампанія» быў прыгавораны ў Гомелі за злоўжыванне ўладай і перавышэнне ўлады да пяці гадоў пазбаўлення волі. Яму ставіліся ў віну злачынствы, учыненыя ў 2012—2013 годзе, калі ён займаў пасаду намесніка старшыні Гомельскага райвыканкама. Былога чыноўніка абвінавачвалі ў незаконным адчужэнні маёмасці ААТ «Гомельскі райаграсэрвіс».
