Пра гэта БелаПАН заявіў лідэр гурту «Крама» Ігар Варашкевіч, каментуючы 11 сакавіка вынікі сустрэчы музыкантаў 21 лістапада 2007 года з былым кіраўніком галоўнага ідэалагічнага ўпраўлення Адміністрацыі прэзідэнта Беларусі Алегам Праляскоўскім.
І.Варашкевіч зазначыў, што пакуль цяжка меркаваць, знята негалосная забарона на творчасць беларускіх рок‑музыкантаў ці не.
Нагадаем, у сустрэчы ўдзельнічалі лідэры рок‑гуртоў «Нейра Дзюбель», «Крама», «N.R.M.» і «Палац». А.Праляскоўскі паабяцаў падтрымку беларускім музыкантам, заявіўшы, што ў іх больш не будзе праблем з прасоўваннем творчасці. Цяжкасці з арганізацыяй выступаў і ратацыяй на айчынных радыёстанцыях у беларускіх гуртоў з’явіліся пасля ўдзелу ў акцыях апазіцыі.
Паводле слоў І.Варашкевіча, на 23 сакавіка ў сталічным клубе «Гудвін» плануецца вялікі сольны канцэрт «Крамы».
«Аднак у буйныя залы мы пакуль не спрабавалі трапіць», — зазначыў ён.
Лідэр гурту «Нейра Дзюбель» Аляксандр Кулінковіч прызнаўся, што ў творчасці калектыву нічога не змянілася: музыканты «як ігралі, так і граюць». Разам з тым ён зазначыў, што 17 лютага гурту ўдалося правесці вялікі канцэрт у клубе «Гудвін». На цырымоніі «Рок‑каранацыя — 2007», нагадаем, гурт «Нейра Дзюбель» прызнаны пераможцай.
«Я не шкадую аб візіце ў Адміністрацыю прэзідэнта. Яшчэ раз паўтару: нас ніхто ні аб чым не прасіў», — сказаў музыкант.
Лідэр гурту «N.R.M.» Лявон Вольскі таксама лічыць, што пасля наведвання Адміністрацыі прэзідэнта беларускім рок‑гуртам не перашкаджаюць у арганізацыі канцэртаў.
«Спыніліся тэлефанаванні адміністрацыі клубаў з патрабаваннямі адмяніць канцэрт, — зазначыў ён. — Датычна гэтага сітуацыя змянілася ў лепшы бок. Застаецца пытанне, ці надоўга?»
У той жа час, паводле яго слоў, на большасці радыёстанцый творчасць беларускамоўных каманд па‑ранейшаму з’яўляецца «нефарматам».
«Але гэта іх справа, справа ўнутранай цэнзуры радыёстанцыі», — сказаў ён.