Польскі відэаблогер Міхал Сікорскі зняў рэпартаж пра сваё падарожжа па Беларусі. Ролік Białoruś — jak tam jest naprawdę? (Беларусь — як там насамрэч?) усяго за некалькі дзён набраў больш за 90 тысяч праглядаў.
Міхал вырашыў праехацца па Беларусі і даведацца, у чым жа адрозненні паміж блізкімі па крыві народамі.
Яго падарожжа пачалося з наведвання Гродна, дзе Міхалу спадабалася некранутая вайной архітэктура, цудоўныя касцёлы, чысціня вуліц і прыгожыя дзяўчаты.
Пасля Гродна яго чакаў Наваградак, дзе Міхал пазнаёміўся з музеем паэта Адама Міцкевіча. Пазней ён адправіўся ў вёску Вялічкава пад Бабруйскам, дзе жылі яго продкі, арыстакраты, аселыя ў тых месцах падчас шведскіх войнаў. Адтуль жа родам яго дзед Фелікс Сікорскі.
Наступным пунктам прызначэння быў Мінск. «У параўнанні з Варшавай, Мінск мае асаблівую атмасферу, якая не нагадвае каменныя джунглі, але ў той жа час гэта горад, у якім ёсць дынаміка і жыццё», — лічыць Міхал.
У цэлым Беларусь пакінула ўражанне забяспечанай і бяспечнай краіны, дзе добрыя дарогі, чыстыя вуліцы, цэны на бензін, цыгарэты і некаторыя прадукты ніжэйшыя, чым у Польшчы.
Засмуціла вандроўцу высокая плата за беларускую візу — 300 злотых.
Міхал Сікорскі ўпэўнены, што Беларусь павінна быць сябрам і саюзнікам Польшчы, таму што два народы вельмі цесна звязаныя паміж сабой гістарычнымі і культурнымі сувязямі. Аднак Міхал цвяроза ацэньвае бягучую сітуацыю і разумее, што ў бліжэйшы час адносіны паміж нашымі краінамі наўрад ці зведаюць пазітыўныя змены.
Дарэчы, у сваім фэйсбуку Міхал Сікорскі піша, што пасля прагляду яго роліка многія палякі выказвалі жаданне з'ездзіць на экскурсію ў Беларусь.
Каментары