Міністэрства ўнутраных спраў Беларусі не адмаўляецца ад лабіравання абмежавання часу продажу ў краіне спіртнога, заявіў на прэс-канферэнцыі 21 кастрычніка ў Мінску намеснік начальніка ўпраўлення прафілактыкі МУС Сяргей Красуцкі.
Нагадаем, гэтым летам у прыватнасці ў Мінску быў абмежаваны час рэалізацыі спіртных напояў у гандлі з 22.00 да 9.00. Аднак у канцы жніўня, пасля нарады ў прэзідэнта, гарадскія ўлады адмянілі гэтую забарону.
Паводле слоў прадстаўніка міліцэйскага ведамства, МУС ужо накіравала ў Савет міністраў свае прапановы. Яны тычацца павышэння патрабаванняў да якасці алкагольнай прадукцыі (каб не было так званых танных він), павелічэння акцызнага складніку ў кошце алкаголю і, адпаведна, павышэння яго цаны, выключэння начнога гандлю, гандлю спіртным у спецыялізаваных аддзелах, узмацнення адказнасці за незаконны абарот алкаголю. Прапануецца канфіскацыя транспартнага сродку як прылады правапарушэння. «Мы ні ад чаго не адмаўляемся і далей спрабуем гэтыя меры лабіраваць», — сказаў намеснік начальніка ўпраўлення МУС.
Красуцкі адзначыў, што ў адпаведнасці з новай рэдакцыяй дырэктывы прэзідэнта № 1 «Аб мерах па ўмацаванні грамадскай бяспекі і дысцыпліны» ўраду да 1 студзеня 2016 года даручана «прыняць меры па выпрацоўцы механізму і адзіных падыходаў органаў дзяржаўнага кіравання па арганізацыі працы, скіраванай на паэтапнае скарачэнне спажывання насельніцтвам алкагольнай прадукцыі».
Як адзначыў кіраўнік Рэспубліканскага цэнтра маніторынгу і прэвенталогіі РНПЦ псіхічнага здароўя Аляксей Кралько, «абмежаванне даступнасці алкаголю — гэта толькі адзін з кампанентаў усёй працы па зніжэнні шкоднага спажывання алкаголю».
«Гэты кампанент у шэрагу краін сапраўды працуе. Міністэрства аховы здароўя на працягу многіх гадоў выступала за абмежаванне не толькі часавай, але і крокавай даступнасці алкаголю, мы нават выступалі за павышэнне ўзросту, з якога магчымы продаж алкаголю, аднак шмат прававых аспектаў, якія перашкаджаюць хутка ажыццявіць такія абмежавальныя меры», — сказаў Кралько.
Што да вынікаў эксперыменту ў сталіцы, то, як заявіў прадстаўнік МУС, «там асабліва няма чаго аналізаваць». «Два месяцы — гэта не той перыяд, па якім можна зрабіць нейкія высновы, які ўплыў адбыўся на колькасць злачынстваў, учыненых у п'яным стане. Мы не аналізавалі, таму што няма ніякага сэнсу», — сказаў Красуцкі.
