Закон аб «Карце паляка» ўвайшоў у сілу 31 сакавіка.
«Сёння былі прыняты першыя пакеты дакументаў ад тых, хто хацеў бы атрымаць «Карту паляка», — сказала М.Садкоўска. — Разглядаць дакументы і прымаць рашэнне будзе консул. На гэта яму дадзена 14 дзён, але ў выпадку неабходнасці тэрмін разгляду дакументаў можа быць падоўжаны».
Паводле слоў прадстаўніцы пасольства, атрымаць карту можа асоба, якая валодае польскай мовай на базавым узроўні, мае ў сваяцтве паляка або таго, хто меў польскае грамадзянства (бацька, маці, бабуля, дзядуля, прабабуля, прадзед). Карта сапраўдная на працягу 10 гадоў з дня выдачы і пры наяўнасці адпаведнай заявы падаўжаецца на наступныя 10 гадоў.
Як раней паведамляў БелаПАН, уладальнік карты мае права: атрымаць доўгатэрміновую шматразовую візу на знаходжанне ў Польшчы; легальна працаваць на тэрыторыі Польшчы без дазволу на працу; займацца прадпрымальніцкай дзейнасцю нароўні з польскімі грамадзянамі; у першачарговым парадку прэтэндаваць на фінансавыя сродкі, што выдзяляюцца для падтрымкі палякаў за мяжой з дзяржаўнага або мясцовага бюджэту (на ўзроўні гміны); праязджаць па чыгунцы з 37‑працэнтнай скідкай.
Міністэрства замежных спраў Беларусі неаднаразова выступала супраць гэтага закона. У прыватнасці, прэс‑сакратар МЗС Андрэй Папоў 7 лютага заявіў, што рэалізацыя закона «Карта паляка» ў яго цяперашняй рэдакцыі «здольная сур’ёзна дэстабілізаваць міжнацыянальныя зносіны ў нашай краіны, выклікаць напружанасць у беларускім грамадстве, парушыць яго стабільнасць і нарадзіць недавер паміж беларускімі грамадзянамі розных нацыянальнасцей».
«Для пераводу дыялогу ў канструктыўнае рэчышча» Беларусь прапанавала Польшчы «выйсці з сумеснай адозвай у кампетэнтныя міжнародныя структуры, уключаючы Венецыянскую камісію Савета Еўропы, з просьбай аб правядзенні незалежнай юрыдычнай экспертызы закона «Карта паляка» на предмет яго адпаведнасці міжнародным нормам». Да атрымання такога заключэння Беларусь прапанавала ўвесці мараторый на прымяненне закона ў дачыненні да беларускіх грамадзян.
