Скоп'е заяўляе пра адкрытасць да перамоваў аб змене назвы сваёй краіны з-за прэтэнзій Грэцыі. Пра гэта заявіў прэм'ер Македоніі Нікола Груеўскі, піша The Guardian.
Паводле яго слоў, у яго ёсць жаданне аднавіць дыялог з Грэцыяй, які патэнцыйна можа выліцца ў змену назвы краіны.
«Мы гатовыя да дыскусіі, адкрытыя да дыялогу з імі і да знаходжання рашэння», — сказаў Груеўскі.
Нагадаем, Грэцыя лічыць, што Македонія «скрала» назву ў адной з паўночных грэчаскіх правінцый.
Спрэчка працягваецца з 1991 года — часу здабыцця незалежнасці Македоніяй, якая да 1991 года насіла назву Сацыялістычная рэспубліка Македонія, што не выклікала супраціву з боку Грэцыі. Пасля 1991 Грэцыя лічыць, што назва дзяржавы з'яўляецца узурпацыяй назвы яе гістарычнай правінцыі.
З-за нязгоды Грэцыі з назвай Македоніі краіна не можа ўступіць у НАТА і пачаць перамовы аб сяброўстве ў ЕС.
«Мы хацелі б як мага хутчэй перайсці да дыялогу з Грэцыяй, каб знайсці рашэнне. І калі мы яго знойдзем, то звернемся да грамадзян, правядзем рэферэндум», — заявіў Груеўскі.
Як адзначае выданне, з абодвух бакоў цяпер ёсць сігналы, што 24-гадовая спрэчка паміж краінамі можа быць вырашаная. Напярэдадні візіту ў Афіны кіраўнік МЗС Македоніі Нікола Папоскі заявіў, што ўмовы для вырашэння канфлікту з назвай «больш чым наспелі».
Варта адзначыць, што гэта будзе першы візіт кіраўніка МЗС Македоніі ў Грэцыю за 15 гадоў. Кіраўнік МЗС Грэцыі Нікас Катзіяс наведаў Скоп'е ў чэрвені ўпершыню за 11 гадоў.
У прыватнасці, ён тады заяўляў: «Мы хочам, каб нашы суседзі сталі сябрамі Еўрасаюза, таму што ад нашай краіны ў значнай ступені залежыць тое, што адбываецца на Балканах».
