Пракуратура Берліна разглядае другое абвінавачванне супраць журналіста расійскага «Першага канала», які раскручваў сфальсіфікаваную гісторыю пра нібыта згвалтаваную мігрантамі дзяўчынку з рускамоўнай сям'і.
Пра гэта паведамляе Радыё Свабода са спасылкай на інфармацыю адваката Марціна Луйтле.
Луйтле прадстаўляе інтарэсы паліцыянта Вольфа Райшара, які абвінаваціў рэпарцёра «Першага канала» Івана Благога ў паклёпе на нямецкую паліцыю.
22 студзеня Луйтле ўжо падаў супраць Благога іншую крымінальную скаргу, абвінаваціўшы журналіста ў распальванні варожасці супраць мігрантаў. Па гэтым абвінавачванні Благому можа пагражаць да пяці гадоў пазбаўлення волі.
У пракуратуры Берліна паведамілі, што яшчэ разглядаюць абодва прадстаўленні.
Як паведамлялася, 16 студзеня ў сюжэце расійскага «Першага канала» аб часовым прыпыненні Аўстрыяй дзеяння Шэнгенскага пагаднення з-за выпадкаў гвалту ў Германіі расказалі пра непаўналетнюю дзяўчынку Лізу з рускамоўнай сям'і, якую нібыта выкралі і згвалцілі, імаверна, мігранты з краін Блізкага Ўсходу.
Аднак пасля стала вядома, што відэа, якое паказаў «Першы канал», не мае дачынення да гісторыі са «згвалтаваннем» — ролік быў апублікаваны на YouTube яшчэ ў верасні 2009 года.
Паліцыя Берліна заявіла, што паведамленні аб выкраданні і згвалтаванні мігрантамі рускай дзяўчынкі, распаўсюджаныя СМІ РФ, аказаліся памылковымі.
Цяпер чытаюць
«Мне сорамна, але я нават не памятаю». Сталі вядомыя новыя падрабязнасці з працэсу здымак эмігрантаў для кіно на БТ10
Каментары