У Мінскім гарадскім судзе разгледелі касацыйную скаргу журналіста Tut.by Паўла Дабравольскага, якога месяц таму, 25 студзеня, затрымалі ў будынку суда Фрунзенскага раёна падчас працэсу над графіцістамі, збілі, а потым яшчэ і аштрафавалі за нібыта непадпарадкаванне міліцыі і дробнае хуліганства.
«Ужо прайшоў адведзены на разбіральніцтва месяц з моманту майго звароту ў Следчы камітэт з просьбай прыцягнуць міліцыянтаў да адказнасці за збіццё. Але адказу ад следчых па-ранейшаму няма: яны не тэлефануюць самі і не адказваюць на мае тэлефанаванні. У СК па-ранейшаму знаходзяцца мае рэчы, парваныя міліцыянтамі, і мабільны тэлефон, на які я спрабаваў зняць падзеі 25 студзеня. Тэлефон мне абяцалі аддаць праз дзень-другі, але зараз яны нават на сувязь са мной не выходзяць», – распавёў прэс-службе БАЖ Павел Дабравольскі.
Пакуль не атрымала адказу на свой зварот у СК і ГА «Беларуская асацыяцыя журналістаў», якая звярнулася туды на наступны дзень пасля інцыдэнту з патрабаваннем прыцягнуць міліцыянтаў да крымінальнай адказнасці.
«У сваёй касацыйнай скарзе я прашу адмяніць штраф у дачыненні да мяне на той падставе, што суд першай інстанцыі адмовіўся выслухаць сведак з майго боку. Акрамя таго, у судовай пастанове шмат нестыковак – некаторыя сказы проста супярэчаць іншым. Але я, калі шчыра, гатовы да любога рашэння. Суд можа як адмяніць папярэдняе рашэнне, так і пакінуць яго ў сіле», — заявіў учора Дабравольскі.
Разгляд справы прайшоў вельмі хутка. Ужо праз 10 хвілін суддзя аб'явіў перапынак на вынясенне рашэння.
У выніку скаргу Дабравольскага суд не задаволіў і пакінуў без зменаў.
Журналіст сказаў «НН», што нечаканасцю для яго гэта не стала. Пасля праверкі Следчага камітэта ён мае намер абскардзіць рашэнне праз старшыню гарадскога суда ці пракуратуру. Абскарджанне рашэння абыдзецца ў 1 базавую велічыню.
***
Нагадаем, што 25 студзеня падчас судовага пасяджэння грамадскія актывісты Павел Сяргей і Максім Шыцік разгарнулі расцяжку «Не — палітычнаму пераследу». Калі маладых людзей сілком выводзілі з залы, Дабравольскі пачаў здымаць інцыдэнт на камеру. Яго затрымалі і збілі разам з актывістамі.
Суддзя Камісараў забараніў сёння яго здымаць. Прымусіў журналістаў выдаліць кадры і праверыў камеру на адсутнасць фота.
Валерый Камісараў у свой час разглядаў касацыйныя скаргі Змітра Дашкевіча, Эдуарда Лобава, Аляксандра Атрошчанкава, Дзмітрыя Новіка і Аляксандра Малчанава. Быў у спісе невыязных чыноўнікаў.
