Міністр замежных справаў Польшчы Вітальд Вашчыкоўскі ўручыў Конраду Паўліку рашэнне прэзідэнта Анджэя Дуды аб прызначэнні яго на пасаду пасла Польшчы ў Беларусі.
Конрад Паўлік — прафесійны дыпламат. У МЗС Польшчы ён працуе ад 2007 года. Ад 2010 па 2012 год ён працаваў у Пастаянным прадстаўніцтве Польшчы пры Арганізацыі эканамічнай супрацы і развіцця (OECD) у Парыжы.
У 2012-2014 гадах быў намеснікам дырэктара Дэпартамента па справах Усходняй Еўропы МЗС, а пазней дырэктарам. Працаваў упаўнаважаным міністра замежных справаў па справах Усходняга партнёрства.
Апошнія два гады Конрад Паўлік каардынаваў замежную дапамогу Польшчы, супрацоўніцтва з палякамі замежжа, усходнюю палітыку і пытанні бяспекі.
Новаму польскаму паслу ў Беларусі 39 гадоў. Ён нарадзіўся ў Варшаве. Скончыў факультэт міжнарожных эканамічных і палітычных адносін Галоўнай гандлёвай школы. У 2001-2006 гадах працаваў у Оргусім універсітэце ў Даніі, абараніў там доктарскую дысертацыю.
Валодае англійскай, расійскай і карэйскай мовамі. Жанаты, мае дачку.
На працягу двух тыдняў новы пасол прыбудзе ў Беларусь. Яго першым заданнем на новай пасадзе стане падрыхтоўка візыта міністра замежных справаў Польшчы Вітальда Вашчыкоўскага ў Мінск.
