Вірус Зіка, які, як лічылася, небяспечны для нованароджаных, здольны выклікаць запаленне мозгу і ў дарослых. Да такой высновы прыйшлі медыкі з Францыі, паведамляюць інфармагенцтвы.
Выпадак уздзеяння віруса Зіка на дарослага чалавека быў зафіксаваны пасля абследавання 81-гадовага мужчыны, які раней здзейсніў падарожжа па краінах Акіяніі.
У пацыента быў дыягнаставаны менінгаэнцэфаліт. Гэтае захворванне спачатку выклікае запаленне галаўнога мозгу, а затым можа пашкодзіць спінны мозг і прывесці да паралічу. Медыкі лічаць, што менінгаэнцэфаліт мог выклікаць вірус Зіка, усе іншыя прычыны — віруснага і бактэрыяльнага паходжання — выключаныя.
Адзначаецца, што шпіталяваны мужчына раней меў моцнае здароўе, перадумоў для падобнага захворвання не было.
Раней лічылася, што вірус Зіка ўяўляе небяспеку для цяжарных жанчын, паколькі можа выклікаць мікрацэфалію (памяншэнне мозгу) ў нованароджаных. Вакцыны ад віруса да гэтага часу няма.
