Новыя ліміты на ўвоз з-за мяжы тавараў па-ранейшаму выклікаюць у беларусаў нямала пытанняў. Ці распаўсюджваюцца абмежаванні, якія ўвядуць 14 красавіка, на багаж у самалёце? Ці трэба дэклараваць пры выездзе за межы краіны асабістыя рэчы, каб потым не плаціць пошліну? Ці будуць улічвацца камандзіроўкі пры падліку лімітаў? Спецыялісты Дзяржаўнага мытнага камітэта адказалі на пытанні чытачоў TUT.BY, звязаныя з купляй тавараў за мяжой па новых правілах.
Мы ўжо распавялі пра новыя ліміты на пасылкі. Але абмежаванні ўвядуць і для тых, хто будзе перасякаць мяжу часцей за адзін раз у тры месяцы. У такім выпадку можна будзе прывезці бязпошлінна з-за мяжы тавар на суму больш за 300 еўра або вагой больш за 20 кілаграмаў, за перавышэнне лімітаў прыйдзецца заплаціць увазную мытную пошліну з сумы перавышэння, мытны збор і падатак на даданую вартасць. Тыя, хто будуць выязджаць за мяжу не часцей за адзін раз у тры месяцы, змогуць правезці для асабістага карыстання тавар на суму да 1500 еўра і вагой не больш за 50 кілаграмаў (гэтыя нормы дзейнічаюць цяпер).
Пры перасячэнні мяжы авіятранспартам ліміты на тавары застаюцца ранейшымі — на суму да 10 000 еўра і вагой не больш за 50 кілаграмаў незалежна ад колькасці паездак за мяжу.
Нагадаем, з 14 красавіка таксама ўводзяцца новыя ліміты на міжнародныя пасылкі — да 22 еўра і вагой да 10 кілаграмаў.
Як будуць вызначаць кошт рэчаў у багажы?
Пытанне: Добры дзень! Растлумачыце, калі ласка, наступныя пытанні. 1. Як мытня будзе рабіць ацэнку тавараў, якія ўвозяцца ў РБ? Да прыкладу, прадукты, бытавая хімія, адзенне. Ці неабходна мець чэкі на ўсе пакупкі, у тым ліку і набытыя на рынку? 2. Калі я ўвожу тавары на суму да 300 еўра, а мытня не згодная з гэтай ацэнкай, пры гэтым я ўжо заехаў у зялёны калідор, ці будзе гэта лічыцца адміністрацыйным правапарушэннем? І як падстрахавацца ад такой сітуацыі — выбіраць «на ўсялякі выпадак» чырвоны калідор і дэклараваць усе тавары?
— Падыходы да вызначэння мытнага кошту ўвозімых тавараў не зменяцца. Каб пазначыць кошт тавару, які ўвозіцца, грамадзяне могуць прад'явіць дакументы (дагавор, спецыфікацыя, рахунак-фактура, таварны чэк, квітанцыя аб аплаце і іншыя). Пры адсутнасці дакумента, які пацвярджае кошт тавару, яго кошт вызначаць супрацоўнікі мытні на падставе наяўных у іх распараджэнні крыніц.
Калі ў вандроўніка, які ўязджае праз зялёны калідор, знойдуць тавары звыш за норму ўвозу, у яго дзеяннях будуць бачыцца прыкметы адміністрацыйнага правапарушэння (недэклараванне тавараў). Таму, калі вы сумняваецеся, лепш не рызыкаваць і адразу адпраўляцца ў чырвоны калідор.
Прыклад. Падарожнік заязджае ў Беларусь другі раз за 3 месяцы і не ўклаўся ў норму, а ён набыў за мяжой тэлевізар за 300 еўра вагой 10 кілаграмаў і мабільны тэлефон за 150 еўра. Агульны кошт тавару — 450 еўра, перавышэнне ліміту — 150 еўра. І калі тэлевізар уваходзіць у ліміты, то за тэлефон трэба ўнесці мытныя плацяжы. Мытны збор складзе 50 еўра, мытная пошліна — 0% (яе памер залежыць ад катэгорыі тавару, у дадзеным выпадку нулявы), а таксама ПДВ — 30 еўра. Атрымліваецца, што за тэлефон прыйдзецца ўнесці мытныя плацяжы ў агульнай суме ў 80 еўра, у выніку ён абыдзецца ў 230 еўра.
Пытанне: Пры непрызнанні мытняй рэчаў, якія ўвозяцца, таварамі для асабістага карыстання, дзе можна скласці мытную дэкларацыю, напрыклад, едучы на пасажырскім цягніку? Колькі па часе зойме складанне дэкларацыі і плацяжы за складанне дэкларацыі, мытныя зборы і пошліны?
— Мытную дэкларацыю можна прадставіць у пункце мытнага афармлення пры перасячэнні мяжы альбо змясціць тавары пад мытную працэдуру мытнага транзіту да ўнутранага пункта мытнага афармлення. Для вылічэння мытных збораў ужываецца афіцыйны курс беларускага рубля да замежнай валюты, усталяваны Нацбанкам на дзень рэгістрацыі дэкларацыі на тавары.
Адносна часу, які затрачваецца інспектарам на правядзенне мытнага кантролю (агляд, надгляд), варта сказаць, што ён шмат у чым залежыць ад колькасці тавару і гатоўнасці асобы спрыяць (ажыццяўляць разгрузку, адкрыццё ўпакоўкі, даваць тлумачэнні і гэтак далей) правядзенню неабходных формаў кантролю.
Ці закрануць абмежаванні багаж пасажыраў самалётаў?
Пытанне: Добры дзень! У мяне такое пытанне. У новым указе прапісана, што ліміты на ўвоз тавараў з-за мяжы 300 еўра не распаўсюджваюцца на паветраныя перавозкі, але калі я прылячу на самалёце з нейкай краіны, а праз тыдзень, напрыклад, паеду ў Літву на цягніку і затым зноў на цягніку назад. Якія нормы будуць дзейнічаць пры вяртанні на цягніку?
— Змены прынялі, каб прадухіліць спробы перамяшчэння грамадзянамі камерцыйных партый тавараў пад выглядам тавараў для асабістага карыстання. Пры перасячэнні мяжы паветраным транспартам такія рызыкі мінімальныя, таму дадзеныя абмежаванні не распаўсюджваюцца на тавары, што перавозяцца ў багажы грамадзян, якія перасякаюць мяжу на самалёце.
Колькасць перасячэнняў фізічнай асобай мытнай мяжы паветраным відам транспарту, а таксама ў пунктах пропуску праз «небеларускі» ўчастак мытнай мяжы ЕАЭС для ўказаных мэтаў не ўлічваецца.
Пра перавозку рэчаў назад у Беларусь пасля пражывання за мяжой
Пытанне: Добры дзень! Мая знаёмая пасля працяглага пражывання за мяжой вяртаецца ў Беларусь на пастаяннае месца жыхарства. Яна будзе перавозіць назад свае рэчы. Ці будуць па адносінах да яе прымяняцца новыя ліміты?
— Парадак перамяшчэння тавараў для асабістага карыстання пры перасяленні фізічных асоб на пастаяннае месца жыхарства вызначаны міжнароднымі дамовамі, рашэннямі Камісіі Мытнага саюза і заканадаўчымі актамі Рэспублікі Беларусь. Нарматыўныя акты па гэтым пытанні размешчаныя на сайце ДМК. Дзеянне ўказа № 40 на такую катэгорыю асоб не распаўсюджваецца.
Ці трэба дэклараваць асабістыя рэчы?
Пытанне: Ці будуць асабістыя рэчы ўключацца ў ліміты? Ці трэба дэклараваць іх пры выездзе з Беларусі?
— Абмежаванні не распаўсюджваюцца на былыя ва ўжыванні тавары, якія ўвозяцца назад у нязменным стане пасля вывазу (акрамя натуральнага зносу). Напрыклад, мабільныя тэлефоны, фотаапараты, планшэты, ноўтбукі і інш.
Дэклараванне асабістых рэчаў пры выездзе застаецца на меркаванне падарожнікаў.
Калі пры выездзе рабілася дэклараванне, то пры ўездзе назад можа быць прадастаўленая пасажырская мытная дэкларацыя, запоўненая пры вывазе. Калі пры выездзе не рабілася дэклараванне, то праходжанне кантролю праходзіць у рамках мытнага кантролю (падыходы да аднясення тавараў і б/у рэчаў не змяніліся).
Пра правоз асабістых рэчаў непаўналетнімі
Пытанне: Мой непаўнагадовы сын (15 гадоў) часта выязджае за мяжу для ўдзелу ў спаборніцтвах. Часцей за ўсё — без суправаджэння бацькоў, а толькі з трэнерам. З сабой ён вязе спартыўны інвентар, у тым ліку ракеткі. Ці трэба ў такім выпадку пры выездзе з Беларусі дэклараваць спортінвентар? Калі так, то хто павінен гэта рабіць — 15-гадовы сын, трэнер або патрабуецца нейкая пісьмовая заява бацькоў (або і зусім іх абавязковая прысутнасць пры выездзе за мяжу)? Ці зменяцца правы дэкларавання пры дасягненні сынам 16 або 17 гадоў?
— У выпадку, калі кошт спортінвентару, былога ва ўжыванні, перавышае 1500 еўра і 50 кг і вы плануеце яго потым увозіць назад, яго трэба задэклараваць пры выездзе.
Нормы бяспошліннага ўвозу распаўсюджваюцца на тавары незалежна ад узросту асобы, якая iх перамяшчае. Узрост грамадзяніна ўлічваецца толькі пры перамяшчэнні алкагольнай прадукцыі, піва і тытунёвых вырабаў. Варта адзначыць, што алкаголь і тытунёвыя вырабы могуць увозіць толькі паўналетнія грамадзяне.
Мытнае дэклараванне тавараў для асобы, якая не дасягнула шаснаццацігадовага ўзросту, робіцца асобай, якія суправаджаюць яго (адным з бацькоў, усынавіцелем, апекуном або папячыцелем гэтай асобы, іншай асобай, якая яего суправаджае, цi прадстаўніком перавозчыка пры адсутнасці суправаджальных асоб, а пры арганізаваным выездзе (ўездзе) групы непаўналетніх асоб без суправаджэння бацькоў, усынавiцеляў, апекуноў цi папячыцеляў, iншых асоб — кіраўніком групы або прадстаўніком перавозчыка).
На грамадзян якіх дзяржаў распаўсюджваюцца ліміты?
Пытанне: А як будуць перасоўвацца праз беларускую мяжу расейцы, казахі: па ўказе або па пагадненні ў МС?
— Абмежаванні распаўсюджваюцца на фізічных асоб незалежна ад іх грамадзянства.
«Мытняй будзе ўлічвацца кожнае перасячэнне мяжы, а не ўвоз тавараў»
Пытанне: З 14 красавіка пачынаюць дзейнічаць абмежаванні на ўвоз тавараў для беларусаў, якія будуць перасякаць мяжу часцей за адзін раз у тры месяцы. Адлік 3 месяцаў пачнецца з 14 красавіка? Ці будуць улічвацца паездкі да гэтай даты?
— Новыя ліміты будуць прымяняцца з 14 красавіка, адлік трох каляндарных месяцаў пачынаецца з дадзенай даты. Паездкі, зробленыя да ўступлення новых правілаў, напрыклад, 5 красавіка, не будуць улічвацца пры падліку новых лімітаў.
Напрыклад, калі фізасоба ўвязе тавар для асабістага карыстання 14 красавіка, то ў наступны раз яна зможа ўвесці тавар без прымянення новых лімітаў (300 еўра і 20 кілаграмаў) пасля 1 ліпеня.
Супрацоўнікамі мытні будзе ўлічвацца кожнае перасячэнне фізасобай беларускага ўчастка знешняй мяжы ЕАЭС (за выключэннем паветранага транспарту), а не ўвоз тавараў. Прычым прымаецца пад увагу не дата выезду, а дата ўезду.
Пытанне: Ці будуць уваходзіць у абмежаванні (не больш за 300 еўра) тавары, набытыя ў крамах duty free?
— Тавары, набытыя ў магазінах бяспошліннага гандлю, будуць улічвацца пры вызначэнні кошту і вагі тавараў.
Даведка. Мытны збор складае 20 і 50 еўра ў залежнасці ад групы тавару. Да прыкладу, збор у 20 еўра трэба заплаціць за правоз прадуктаў жывёльнага і расліннага паходжання, гатовых харчовых прадуктаў, алкагольных і безалкагольных напояў, тытуню, фармацэўтычнай прадукцыі, тавараў са скуры, тэкстыльных вырабаў, абутку і іншых тавараў.
Максімальны збор у 50 еўра прыйдзецца заплаціць, да прыкладу, за прамысловыя тавары (цацкі, мэбля, пасцельныя прыналежнасці, лямпы і асвятляльнае абсталяванне і іншае), творы мастацтва, прадметы калекцыявання і антыкварыят, жэмчуг прыродны або культываваны, каштоўныя або напаўкаштоўныя камяні; машыны і іншыя тавары.
Пра камандзіроўкі
Пытанне: Да прыкладу, 1 мая вяртаюся з камандзіроўкі, нічога з сабой не ўвожу. 15 мая зноў выязджаю за мяжу і, вяртаючыся, вязу з сабой туфлі коштам 350 еўра. Ці будзе ўлічвацца той факт, што пры першым перасячэнні мяжы я нічога не ўвозіла, або аўтаматычна я павінна буду заплаціць пошліну, і з якой сумы яна будзе разлічана?
— Незалежна ад таго, па якой прычыне грамадзянін выязджае за мяжу (камандзіроўка, падарожжа, шоп-тур, наведванне сваякоў і да т.п.), пры ўвозе тавараў часцей за адзін раз у тры месяцы да тавараў для асабістага карыстання будуць аднесеныя тавары на суму не больш за 300 еўра і вагой не больш за 20 кілаграмаў.
Пры перавышэнні лімітаў тавар не будзе аднесены да тавараў для асабістага карыстання, у такім выпадку ён падпадзе пад мытнае дэклараванне, яго трэба задэклараваць.
Паўторым, што супрацоўнікі мытні будуць улічваць кожнае перасячэнне фізасобай беларускага ўчастка знешняй мяжы ЕАЭС (за выключэннем паветранага транспарту), а не ўвоз тавараў. Прасцей кажучы, камандзіроўка таксама будзе ўлічвацца пры падліку лімітаў на тавары.
Пра падарункі
Пытанне: Я езджу за мяжу не часцей 1 разу ў год. Еду ў канцы красавіка ў Грэцыю для знаёмства са сваякамі маёй дачкі, яна ў Грэцыі выйшла замуж. Ці змагу я для сябе набыць футра і не плаціць падаткі, бо яно, натуральна, будзе каштаваць больш за 300 даляраў? І калі мне (раптам) дачка захоча яго падарыць, то змагу я яго таксама правезці без выплаты падаткаў і якія дакументы пры гэтым патрэбныя? Дзякуй.
— Нормы бяспошліннага ўвозу тавараў у 1500 еўра і 50 кг працягваюць дзейнічаць, калі вы ўвозіце тавары не часцей за адзін раз у тры месяцы незалежна ад таго, былі набытыя рэчы ці атрыманыя ў падарунак.
