На нафтахімічным заводзе ў мексіканскім штаце Веракрус, дзе напярэдадні адбыўся магутны выбух, пачалася ўцечка хлору, паведамляюць інфармагенцтвы са спасылкай на канал Televisa.
Выбух адбыўся ў горадзе Каацакаалькас на паўднёвым усходзе краіны. Першапачаткова паведамлялася аб тым, што завод належыць кампаніі Pemex. Аднак пазней кіраўніцтва Pemex удакладніла, што выбух адбыўся на прадпрыемстве PMV пад кіраваннем кампаніі Mexichem, з якой супрацоўнічае Pemex.
Як распавядаюць відавочцы, пасля выбуху над раёнам з'явілася воблака дыму. Выратавальныя службы рэгіёну папярэдзілі аб значным выкідзе шкодных рэчываў пры выбуху.
З тэрыторыі завода эвакуяваныя каля 2 тысяч супрацоўнікаў, зачыненыя школы і офісы ў ваколіцах прадпрыемства. Жыхарам раяць не выходзіць на вуліцу, бо ёсць небяспека атручвання.
Што стала прычынай выбуху, пакуль невядома.
Паводле ўдакладненых дадзеных, ахвярамі НЗ сталі 13 чалавек, яшчэ 136 атрымалі раненні.