Беларускія лекавыя сродкі не горшыя за імпартныя па якасці і эфектыўнасці, але значна таннейшыя, заявіў міністр аховы здароўя Васіль Жарко на з'ездзе фармацэўтычных работнікаў 22 красавіка ў Мінску. Пры гэтым ён зазначыў, што да пытання выбару лекавых сродкаў «падыходзіць трэба ўдумліва з улікам спецыфікі сітуацыі».
Міністр зазначыў, што кожны год доля айчынных лекавых сродкаў на фармрынку павялічваецца і па выніках 2015 года склала 52,7%.
Задачамі айчыннай фармпрамысловасці, сказаў міністр, з'яўляюцца засваенне новых лекавых сродкаў, дыверсіфікацыя паставак, а да 2020 года — рост аб'ёму экспартных паставак прадукцыі ўласнай вытворчасці не менш як у два разы і зніжэнне сабекошту прадукцыі на 25%, а таксама стварэнне новых працоўных месцаў.
У сувязі з папулярызацыяй беларускіх лекаў намеснік міністра аховы здароўя, дырэктар дэпартамента фармацэўтычнай прамысловасці Валерый Шаўчук падкрэсліў важнасць «фарміравання станоўчага іміджу лекавых сродкаў сярод спецыялістаў і насельніцтва рэспублікі».
Ён паведаміў, што на рэкламу лекавых сродкаў затрачваюцца сур'ёзныя сродкі. Напрыклад, РУП «Белмедпрэпарты» за 2013—2015 гады выдаткавала на рэкламныя і маркетынгавыя мерапрыемствы 8,7 млрд рублёў, за першы квартал 2016-га — 696 млн, Барысаўскі завод медпрэпаратаў — 11 млрд і 673 млн рублёў адпаведна. «Гэтая праца мае вельмі вялікія рэзервы», — лічыць намеснік міністра.
Паводле яго слоў, павялічваецца колькасць прадпрыемстваў, якія маюць сертыфікаты GMP аб належнай вытворчай практыцы. Цяпер сярод беларускіх фармпрадпрыемстваў сертыфікат GMP маюць 48 вытворчых участкаў, у 2015 годзе атрымана 17. Самая вялікая колькасць участкаў (10) сертыфікавана на Барысаўскім заводзе медпрэпаратаў і «Белмедпрэпаратах» (7).
Кажучы пра міжнародныя сертыфікаты якасці міжнароднай фармінспекцыі PIC/S, намеснік міністра адзначыў, што такія дакументы ёсць у чатырох прадпрыемстваў — ТАА «Фармтэхналогія», СТАА «Лекфарм», РУП «Белмедпрэпараты» і Барысаўскага завода медпрэпаратаў.
Шаўчук таксама паведаміў, што на ўнутраным рынку 76,2% айчынных лекавых сродкаў рэалізуецца ў рознічных аптэчных сетках (больш за 80% з іх належаць дзяржаве) і 23,8% — у шпітальным сектары. Ад 70% да 80% прадукцыі вядучых вытворцаў лекавых сродкаў — РУП «Белмедпрэпараты» і Барысаўскага завода медпрэпаратаў — прадаюцца ў аптэках па цане ніжэйшай за адзін долар у эквіваленце за ўпакоўку.
