Начальнік СІЗА ў расійскім Новачаркаску, у якім утрымліваюць асуджаную ўкраінскую лётчыцу і нардэпа Надзею Саўчанка, выдаў ёй пакет дакументаў для экстрадыцыі ва Украіну, паведаміла яе сястра Вера Саўчанка.
Пра гэта сястра лётчыцы распавяла ТСН пасля спаткання з ёй.
«Яна цяпер запаўняе дакументы: заяву, біяграфічныя дадзеныя і іншыя. Як сказаў начальнік турмы Калганаў, яны неабходныя для экстрадыцыі. Ёй сказалі, што гэтыя дакументы паводле працэдуры неабходна запоўніць для экстрадыцыі. Будзем спадзявацца, што гэта так», — кажа Вера.
Паводле яе слоў, Надзея, хоць і запаўняе паперы, усё ж асцерагаецца, што гэтыя дакументы могуць быць выкарыстаныя для этапавання, паколькі ў пачатку працэсу яе ўжо падманвалі з запаўненнем дакументаў.
Стан здароўя Саўчанка, як распавяла яе сястра, нармальны, а настрой добры, яна ўжо можа ўжываць нармальную ежу.
Пры гэтым у яе назіраецца праблема з нагамі — яны ацякаюць з-за парушэння функцыянавання нырак.
