У Новасібірску супрацоўнікамі цэнтра па барацьбе з экстрэмізмам затрыманы ідэолаг штогадовай першамайскай акцыі пад назвай «Манстрацыя» мастак Арцём Ласкутоў.
«Затрымалі, вязуць у Цэнтральнае РУУС», — распавёў Ласкутоў агенцтву ТАСС.
Пазней ён выклаў у сябе ў «Твітары» фота паліцэйскага пратакола, з якога вынікае, што яго затрымалі за правядзенне шэсця без узгаднення з мэрыяй Новасібірска.
Гэта не першае затрыманне Ласкутова ў сувязі з правядзеннем «Манстрацыі».
@ikentavr
«Манстрацыя» была прыдуманая больш за 10 гадоў таму, у 2004 годзе, як альтэрнатыва першамайскага шэсця. Яе ўдзельнікі апранаюць пацешныя касцюмы і нясуць плакаты жартоўнага зместу.
Самі ўдзельнікі акцыі кажуць, што гэта «вясёлае шэсце свабодных людзей па горадзе з абсурдысцкімі лозунгамі, якія адлюстроўваюць жыццё».
У 2011 годзе Арцём Ласкутоў атрымаў за свой праект прэмію ў катэгорыі «Сучаснае мастацтва», якую ўручаюць Дзяржаўным цэнтрам сучаснага мастацтва. Аднак у 2015 годзе мэрыя Новасібірска адмовілася ўзгадніць шэсце, і яе натхняльнік быў затрыманы на 10 сутак за непадпарадкаванне распараджэнню супрацоўніка паліцыі і яшчэ на 10 сутак за парушэнне ўстаноўленага парадку арганізацыі і правядзення шэсця або пікетавання.
Сёлета «Манстрацыя» была ўзгодненая з уладамі Новасібірска, удзельнікі акцыі далучыліся да арганізаванага мэрыяй «Усяшэсця».
Галоўным лозунгам сёлетняй «Манстрацыі» стала фраза «Тут вам не Масква». Расцяжку з надпісам неслі на чале калоны. Паведамляецца, што такую фразу сказалі арганізатарам акцыі супрацоўнікі мэрыі пры ўзгадненні мерапрыемства.
Па ацэнцы самога Ласкутова, сёлета на акцыю выйшлі каля 2 тысяч чалавек, што прыкметна больш, чым у папярэднія гады.
Яны неслі разнастайныя плакаты — напрыклад, такія: «Пастернак или как?», «Здравствуйте, вы верите в БГ?», «Не надо печалиться, все лето впереди», «Рано или поздно, так или иначе» – і скандавалі «РПЦ! РПЦ!», «Что за дичь! Что за дичь!», «Русские блины! Русские блины», а также «Запрещенка! Запрещенка!».
