30 красавіка, падчас візіту ў мемарыяльны комплекс «Хатынь» лідар пуцінскіх матацыклістаў Аляксандр Залдастанаў сказаў, што лічыць Беларусь і Украіну часткамі Расіі. «Беларусь — гэта Расія, Украіна — гэта Расія», — заявіў ён.
Пры гэтым Залдастанаў — асоба публічная, візіт ягонага клуба «Начныя ваўкі» асвятляўся ў расійскіх і беларускіх медыях, а актывісты брэсцкага БРСМ нават зладзілі пышную сустрэчу расійскім гастралёрам.
Сёння «Наша Ніва» датэлефанавался ў КДБ з просьбай пракаментаваць гэтыя словы Залдастанава.
Мы звярнулі ўвагу на тое, што заяву пуцінскага матацыкліста можна кваліфікаваць як парушэнне арт. 361 КК Беларусі, які прадугледжвае адказнасць за заклікі да парушэння тэрытарыяльнай цэласнасці краіны ды інш.
«Каментаваць заявы чалавека, які быў у невядома яшчэ ў якім стане, падчас іх выказвання, я не буду», — сказаў нам прэс-сакратар КДБ Дзмітрый Пабяржын.
«Але я звярну ўвагу нашых кампетэнтных падраздзяленняў на гэта», — запэўніў Пабяржын.
